काठमाडौं, पुष ४-
सुपरस्टार लिओनल मेसीले विश्वकपमा आफ्नो खेल जित्दै पहिलो पटक विश्वकप ट्रफी उचाल्दै करियरलाई सार्थक बनाए ।
आइतबार कतारको लुसेस आइकोनिक स्टेडियममा साविक विजेता फ्रान्सलाई पेनाल्टी सुटआउटमा ४-२ ले पराजित गर्दै अर्जेन्टिनाले ३६ वर्षपछि पहिलो पटक विश्वकप उपाधि जित्यो ।
समग्रमा अर्जेन्टिनाले जितेको यो तेस्रो विश्वकप उपाधि हो भने मेसीले पाँचौ पटक विश्वकप खेल्दा पहिलो पटक ट्रफी उचाल्ने अवसर पाए ।
क्लब फुटबल सबैखाले उपाधि र व्यक्तिगत अवार्ड जितिसकेका मेसीका लागि यस विश्वकपअघि जित्न बाँकी एउटै ट्रफी थियो । जुन ६४ खेल र एक महिना चलेको २२औं संस्करणको उपाधि जित्दै उनले पूरा गरे ।
फाइनलपछि मेसीले सानैदेखि आफूले देखेको सपना पूरा भएको बताए । साथै उनले राष्ट्रिय टिमबाट तत्कालन सन्यास नलिने र च्याम्पियन प्लेअरको रुपमा अझै केही समय खेल्ने समय बताइसकेका छन् ।
फ्रान्ससँग खेल्नुअघि विश्वकपमा भने यही फाइनल नै आफ्नो अन्तिम विश्वकप खेल हुने मेसीले बताएका थिए ।
३५ वर्षीय मेसीले विश्वकप ट्रफी चुम्लाई १६ वर्ष मिहिनेत गरे । यस क्रममा उनले एक पटक फाइनल खेले पनि जर्मनीसँग पराजित भएपछि उपाधि जित्न सकेका थिएनन् । दोस्रो पटक फाइनल पुर्याउँदा भने उनी भाग्यमानी सावित भए र मिहिनेतको फल पाए ।
क्लब फुटबलमा दर्जनौं कीर्तिमान बनाइसकेका मेसीलाई यस अघि विश्वकप जित्न नसक्ने, विश्वकपको नकआउट चरणमा गोल गर्न नसक्ने लगायत विभिन्न किसिमको आलोचना हुने गर्थ्यो ।
तर अहिले यो सबैको जवाफ मात्र प्राप्त भएको छैन मेसीले विश्वकप फुटबलमै पनि दर्जन बढी कीर्तिमान बनाए । कति कीर्तिमान तोडिएलान् कति कीर्तिमान तोडिन असम्भव जस्तै छ । यसलाई लिएर फुटबलका भावी पुस्ताले पनि गर्व गर्नेछन् ।
कतार विश्वकपपछि मेसीले विश्वकप फुटबलमा बनाएका कीर्तिमानहरू ।
१, सर्वाधिक खेल :
मेसीले विश्वकपमा सर्वाधिक २६ खेल खेलेका छन् । कतारमा सबै ७ खेल खेल्दै उनले सर्वाधिक २५ खेल खेलेका जर्मनीका लोथार माथाउसको कीर्तिमान तोडेका हुन् । जर्मनीकै मिरोस्लाभ क्लोजले २४ खेल खेलेका छन् भने इटलीका पाउलो माल्दिनीले २३ र पोर्चुगलका क्रिस्टियानो रोनाल्डोले २२ खेल खेलेका छन् ।
२, दुई पटक विश्वकप गोल्डेन बल :
विश्वकपको ९२ वर्षे इतिहासमा मेसी दुई पटक गोल्डेन बल जित्ने पहिलो खेलाडीसमेत बनेका छन् । यसअघि सन् २०१४ मा फाइनल पुग्दा पनि मेसीले गोल्डेन बल जितेका थिए । कतारमा अर्जेन्टिनालाई च्याम्पियन बनाउँदा प्रतियोगिताकै उत्कृष्ट खेलाडी बन्दै मेसीले दोस्रो पटक गोल्डेन बल जितेका हुन् ।
फाइनलमा फ्रान्सविरुद्ध दुई गोल गरेका मेसी ७ गोलसहित सर्वाधिक गोल गर्नेमा भने दोस्रोमा रहे । फाइनलमा ह्याट्रिक गरेका किलिएन एमबाप्पेले ८ गोल सहित गोल्डेन बुट अवार्ड जिते ।
३, पाँच फरक विश्वकपमा असिस्ट :
मेसी पाँच फरक विश्वकपमा गोलका लागि असिस्ट गर्ने पहिलो र एक मात्र खेलाडी हुन् । उनले सन् २००६ देखि २०२२ सम्म खेलेका पाँच वटै विश्वकपमा असिस्ट गरेका छन् ।
४, विश्वकपको हरेक चरणमा गोल गर्ने पहिलो खेलाडी :
मेसीले कतार विश्वकपअघि नकआउट चरणमा गोल गर्न सकेका थिए । तर यस विश्वकपमा आफ्नो जादुबाट उनले चमत्कार नै गरे भन्दा फरक पर्दैन । मेसीले खेलेका ७ मध्ये ६ खेलमा गोल गरे । त्यसमा पनि उनले समूह चरण देखि हरेक चरणमा गोल गरे । मेसी समूह चरण, अन्तिम १६, क्वाटरफाइनल, सेमिफाइनलमा र फाइनलमा गोल गर्ने एक्लो खेलाडी बने ।
५, विश्वकपमा सर्वाधिक खेल जित :
मेसीले विश्वकपमा सर्वाधिक १७ खेल जित्ने जर्मनीका मिरोस्लाभ क्लोजको कीर्तिमान बराबरी गरेका छन् ।
६, कप्तानको रुपमा धेरै खेल :
मेसीले विश्वकपमा कप्तानको रुपमा सर्वाधिक १९ खेल खेर्लेका छन् । उनीपछि मेक्सिकोमा राफा मार्क्वेजले १७ र अर्जेन्टिनाका डिएगो म्याराडोनाले १६ खेलमा विश्वकपमा कप्तानी गरेका छन् ।
७, विश्वकपमा सर्वाधिक मिनेट खेल्ने खेलाडी :
मेसीले विश्वकपमा सर्वाधिक २ हजार ३१४ मिनेट खेलेका छन् । उनले इटलीका पाउलो माल्दिनीको नाममा रहेको २ हजार २१७ मिनेट खेल्ने कीर्तिमान तोडेका हुन् । फ्रान्सविरुद्ध फाइनलमा २४ मिनेट खेलेपछि नै मेसीले कीर्तिमान तोडेका थिए ।
८, सर्वाधिक विश्वकप खेल्ने खेलाडी :
मेसी सर्वाधिक ६ पटक विश्वकप खेल्ने ६ खेलाडीमध्ये एक हुन् । मेसीसँगै मेक्सिकोका एन्टोनिओ कार्भाजल, जर्मनीङ्का लोथार म्याथाउस, मेक्सिकोकै राफा मार्क्वेज र आन्द्रेज गुअर्डाडो र पोर्चुगलका क्रिस्टियानो रोनाल्डोले ६ विश्वकप खेलेका छन् ।
९, नकआउट चरणमा सर्वाधिक असिस्ट :
मेसीले नकआउट चरणमा सर्वाधिक असिस्ट गर्ने पेलेको कीर्तिमान बराबरी गरेका छन् । दुवैले समान ६ असिस्ट गरेका छन् ।
१०, अर्जेन्टिनाको सर्वाधिक गोलकर्ता :
मेसी विश्वकपमा अर्जेन्टिनाका लागि सर्वाधिक गोल गर्ने खेलाडी समेत बने । उनले विश्वकपमा १३ गोल गरेका छन् । मेसीले २००६ को विश्वकपमा १ गोल गरेका थिए भने २०१४ मा चार र २०१८ मा १ गोल नै गरेका थिए । २०१० मा भने गोल गर्न सकेनन् । यस पटक उनले विश्वकपमा ७ गोल गरे । मेसीले गाब्रीएल बाटिस्टुटालाई पछि पारेका हुन् । बाटिस्टुटाले १० गोल गरेका छन् ।
विश्वकप इतिहासमै सर्वाधिक गोल गर्नेमा मेसी फ्रान्सका जस्ट फोन्टेनसँगै संयुक्त रुपमा चौथो स्थानमा छन् ।
जर्मनीका मिरोस्ला क्लजले सर्वाधिक १६ गोल गर्दा ब्राजिलका रोनाल्डोले १५ र जर्मनीकै गर्ड मुलरले १४ गोल गरेका छन् ।
११, आफ्नो हरेक दशकमा विश्वकपमा गोल :
मेसीले आफ्नो हरेक दशकमा विश्वकपमा गोल गर्ने पहिलो खेलाडी बने । उनले टिनएज, ट्वेन्टिज र थर्ट्टिजमा गोल गरे । पेलेले भने केही महिनाले यो अवसर गुमाएका थिए ।
१२, पहिलो र अन्तिम गोलबीचको अवधि :
मेसीले विश्वकपमा पहिलो र अन्तिम गोल गर्दाको समय अवधि सबैभन्दा धेरै छ । मेसीको पहिलो र अन्तिम गोलको समयअवधि १६ वर्ष १८४ दिन छ । त्यसपछि रहेका क्रिस्टियानो रोनाल्डोको पहिलो र अन्तिम गोलको अवधि १६ वर्ष १६० दिन छ ।
१३, सर्वाधिक प्लेअर अफ दि म्याच :
मेसी विश्वकपमा सर्वाधिक ११ पटक म्यान अफ दि म्याच घोषित भएका छन् । उनी कतार विश्वकपमा खेलेका ७ मध्ये ५ खेलमा प्लेअर अफ दी म्याच भए । मेसीले एकै विश्वकपमा सर्वाधिक प्लेअर अफ दि म्याच हुने कीर्तिमान समेत बनाए । यसअघि सन् २०१० मा नेदरल्याण्ड्सका वेस्ले इनाइडर र २०१४ मा मेसीले नै चार पटक प्लेअर अफ दि म्याच अवार्ड जितेका थिए । -गोविन्दराज नेपाल, अनलाइन खबर
