– हिरालाल आचार्य ‘डायमण्ड’
चितवन, जेठ ३१ –
चितवनको नवगठित जिसस :
प्रमुख : नेकपा एमालेका नारायण अधिकारी (गोलाप्रथाबाट)
उपप्रमुख : नेकपा एकीकृत समाजवादीकी कल्पना काफ्ले (निर्विरोध)
३ खुल्ला सदस्य :
नेकपा एमालेबाट कृष्णभक्त भट्टराई (गोलाप्रथा)
नेकपा एमालेबाट बाबुराम सुवेदी (गोलाप्रथा)
नेपाली कांग्रेसबाट संजिवप्रसाद पौडेल (गोलाप्रथा)
३ महिला सदस्य :
नेकपा एकीकृत समाजवादीकी पूजाना गुरुङ (निर्वाचित)
नेकपा एमालेकी सविता चौधरी (गोलाप्रथा)
नेकपा एमालेकी अनिता नेपाल (गोलाप्रथा)
१ दलित वा अल्पसंख्यक सदस्य :
नेकपा एमालेकी गुनु विक (गोलाप्रथा)
गोलाप्रथाबाट टुंग्याउनु परेको जिल्ला समन्वयन समिति चितवनमा नेकपा एमाले भाग्याशाली बनेको छ । आज जिसस प्रमुखसहित सात सदस्य पदका लागि भएको निर्वाचनमा एक जना सदस्यबाहेक कसैले जित हाँसिल गर्न सकेनन् । सबैको मत बराबर आयो । त्यसपछि गरिएको गोलाप्रथामा प्रमुखसहित ६ पदमा एमाले विजयी भएको छ ।
मुख्य निर्वाचन अधिकृतको कार्यालय भरतपुरमा भएको निर्वाचनमा कुल १६ जनाको उम्मेद्वारी परेको थियो । निर्वाचनमा एकीकृत समाजवादीकी पूजाना गुरुङमात्र विजयी भइन् । गुरुङलाई एमालेले पनि मत दिएको हो । यस्तै उपप्रमुखमा गठबन्धनबाट नेकपा एकीकृत समाजवादीकी कल्पना काफ्लेको एकल उम्मेद्वारी परेपछि उनी निर्विरोध निर्वाचित भइन् ।
नेकपा एसलाई उपप्रमुखमा जिताएर प्रमुखमा भोट पाउने आशमा एमालेले उपप्रमुखमा उम्मेद्वारी दिएको थिएन । तर एमालेले सोचे जसरी नेकपा एसबाट मत पाउन सकेन । नेकपा एस र एमालेबीच अघोषितरुपमा आन्तरिक सहमति भएको थियो भन्ने कुरा जिसस निर्वाचनमा प्रष्टै देखिन्थ्यो । तर एमालेले समाजवादीबाट धोका खायो ।
जिससमा नेकपा एसले उपप्रमुख र एक सदस्य, नेपाली कांग्रेसले एक सदस्य जितेको छ भने नेकपा माओवादी केन्द्रले कुनै पद जित्न सकेन ।
गोलाप्रथाबाट जिसस प्रमुखमा एमालेका नारायणप्रसाद अधिकारी निर्वाचित भए । सत्ता गठबन्धनबाट उम्मेदवार बनेका नेपाली कांग्रेसका पूर्ण बहादुर रानाभाट पराजित भए ।
तीन जना खुला सदस्यमा एमाले दुईमा विजयी हुँदा कांग्रेसले एउटा सदस्य पद जित्यो । खुला सदस्यमा एमालेबाट कृष्णभक्त भट्टराई र बाबुराम सुवेदी विजयी भए । कांग्रेसबाट संजिवप्रसाद पौडेल निर्वाचित भए । उनीहरु सबै गोलाप्रथाबाट नै निर्वाचित भएका हुन् ।
तीन जना महिला सदस्यमा एकीकृत समाजवादीले एक र एमालेले दुई सदस्य जित्यो । एकीकृत समाजवादीबाट पूजाना गुरुङ १४ मतले विजयी भइन् । उनले एमालेको पनि मत प्राप्त गरेकी हुन् । प्रमुखमा नेकपा एसको भोट आउने आशले नै नेकपा एमालेले महिला सदस्यमा पनि एक जना उम्मेद्वार कम उठाउँदै भोट समाजवादीलाई दिएको हो । अन्य दुई महिला सदस्यमा गोलाप्रथाबाट एमालेबाट सविता चौधरी र अनिता नेपाल निर्वाचित भइन् । कांग्रेसकी अनिता चौधरी र माओवादीकी सुमित्रा तामाङ श्रेष्ठले समान ७ मत ल्याएपछि गोलाप्रथाबाट पराजित हुन पुगे ।
दलित वा अल्पसंख्यक सदस्यमा एमालेकी गुनु विक निर्वाचित भईन् । नेपाली कांग्रेसकी केशरी माया सुनार र गुनुको बराबर ७ मत भएपछि गोलाप्रथाबाट निर्वाचित गरिएको थियो ।
जिससमा प्रमुख र उपप्रमुख सहित ९ सदस्यीय समिति रहने गरेको छ । मतदानमा ७ पालिकाका प्रमुख र उपप्रमुख गरी १४ जनाले भाग लिएका थिए । चितवनमा सात वटा प्रमुख उपप्रमुखमा एमाले र बाँकी सात वटामा सत्ता गठबन्धनले जितेका छन् ।