चितवन, बैशाख २० –
नालाको व्यवस्थापन हुन नसक्दा नारायणगढ बजार दुर्गन्धित बनेको छ ।
नारायणगढ बजारको नाला खुला हुँदा र नालाबाट पानी बगेर अन्यत्र जाने ठाउँ बन्द हुँदा नालाबाट दुर्गन्ध फैलन थालेको हो ।
अहिले नारायणगढ बजार बसिनसक्नु भएको छ । यहाँका व्यावसायीले दुर्गन्ध फैलिएको भन्दै गुनासो गरिरहेका छन् । स्थानीयहरुले विरोध गर्दै विभिन्न सम्बन्धित निकायहरुमा ध्यानाकर्षण पनि गराइरहेका छन् । यो बाटो भएर हिँड्ने यात्रुहरुले छिछि र थुथु गर्दै हिँड्नु पर्ने अवस्था आइपरेको छ ।
उक्त सडक पूर्वपश्चिम राजमार्ग हो । उक्त बाटोलाई ६ लेनमा विस्तार गर्ने काम भइरहेको छ । पुल्चोकदेखि गोन्द्राङ्सम्म यो सडक विस्तार हुँदैछ ।
विस्तारकै क्रममा रहेकाले सडको अवस्था पनि विजोक छ । धुलो उडिरहन्छ । त्यहाँमाथि नालाको गन्धले नारायणगढ बजारलाई एकदमै प्रदुषित बनाएको छ ।
व्यावसायीहरुले दुर्गन्धले गर्दा ग्राहकहरु पसलमा आउनै छाडेको बताएका छन् । यसैगरी स्थानीय टोलहरुले ध्यानाकर्षण कार्यक्रम गरी ब्यानर नै टाँगेर छाडेका छन् । ब्यानरमा लेखिएको छ, ‘खुला ढल, दुर्गन्धित फोहोर र सडक निर्माण कार्यको ढिलासुस्ती लापरबाहीको कारण संक्रामक रोगहरुको जोखिममा नारायणगढ बजार ।’
सम्बन्धित निकायहरु भरतपुर महानगरपालिका, सडक डिभिजन भरतपुर र सडक निर्माणको ठेक्का पाएको इन्डो सगुन जेभीले दुर्गन्ध रोक्नका लागि तत्काल प्रभावकारी कदम चाल्न सकेका छैनन् ।
सडक डिभिजन कार्यालय भरतपुरका प्रमुख सि.डि.ई. रमेश प्रसाद पौडेलले महानगरपालिका र निर्माण कम्पनीको सहकार्यमा अहिले नाला सफा गर्ने काम सुरु गरिएको बताए । नाला सफा भएपछि त्यसमाथि ढकनी लगाउने र ढकनी लगाएपछि दुर्गन्ध रोकिन सक्ने उनले बताए । उनले सडकको पानी बग्न भनेर बनाइएको नालामा त्यहाँका स्थानीय एवम् होटल व्यावसायहीले भान्छाको पानी र कसैकसैले ढल नै मिसाइ दिंदा समस्या आएको बताए ।
‘ढल हाल्ने भनेर सानो ठाउँ बनाइएको रहेछ । तर ढल हाल्ने ठाउँमा नहाली नालामा ढल मिसाइ दिँदा झन् समस्या भएको छ । कतिपयलाई महानगरपालिकाले स्वीकृति पनि दिएको रहेछ । यसतर्फ महानगरनै सचेत हुनुपर्ने देखिन्छ’ उनले भने ।
