चितवन, जेठ १-
चितवनको पहाडी गाउँमा जंगली च्याउ खादा एक जनाको मृत्यु भएको छ ।
जिल्लाको पहाडी क्षेत्र इच्छाकामना-१ कुलबाङकि ६ वर्षकी नमुना चेपाङको च्याउ खादा आज (शुक्रबार) बिहान घरमै मृत्यु भएको हो । उनी हात्तीबाङस्थित राष्ट्रिय माध्यमिक विध्यालयमा कक्षा २ मा अध्ययनरत थिइन् । उनको शव भरतपुर अस्पताल ल्याइदै छ । च्याउ खाएरै सजन चेपाङ र मनिता चेपाङ समेत गम्भीर बिरामी परेका छन् । उनीहरुलाई उपचारका लागि भरतपुर अस्पतालमा ल्याइएको छ । उनीहरू तिनै जना एकै परिवारका हुन् ।
सजन हात्तीबाङ स्कुलमा कक्षा ३ र मनिता कक्षा ५ मा अध्ययनरत छन् । गत मंगलबार च्याउ खाएका उनीहरु बिरामी हुँदा पनि घरमै थिए । आज बिहान नमुनाको मृत्यु भएपछी मात्रै गाउलेहरु घटना बारे थाहा पाएका थिए । त्यसपछि बिरामी परेका सजन र मनितालाइ गाउलेहरू मिलेर अस्पताल ल्याइएको हात्तीबाङ स्कुलका प्रधानाध्यापक लोकबहादुर मगरले जानकारी दिए ।
हात्तीबाङ स्कुल नजिकै स्वास्थ्य संस्थामा बिहान ल्याएको देखेपछि मैले नै गाडी खोजेर संगै भरतपुर अस्पताल ल्याएको छु, च्याउ खादा एक जनाको निधन भइसकेकाले दुई जनालाइ बचाउन अस्पताल पुर्याउन सफल भएका छौं, उनीहरुको उपचार भइरहेको छ । प्रधानाध्यापक मगरले भने।
बिरामी परेका मध्ये अहिले १२ वर्षकी मनिता चेपाङको गम्भीर अवस्थामा भरतपुर अस्पतालमा उपचारमा उपचार भइरहेको छ । अस्पतालका वरिष्ठ फिजिसियन एवं सहायक मेसु डा प्रमोद पौडेलले मनिताको अवस्था गम्भीर रहेकाले भेन्टिलेटरमा राखेर उपचार गर्न लागिएको जानकारी दिए ।
मंगलबार घरका बुवा श्यामबहादुर र आमा पदम माया चेपाङ संगै तीन जना बच्चाले पनि च्याउ खाएका थिए । वडा अध्यक्ष सन्तबहादुर मगरले एक जनाको निधन भएपछि अरु दुई जनालाइ हतार हतार अस्पताल पठाइएको बताए ।
अस्पतालले घरमै रहेका बुवा आमालाइ पनि अस्पताल ल्याउन भनेको छ । ठुलो मान्छेलाई पछि लक्षण देखा पर्ने भएकाले बुवा आमालाई ल्याउन लागिएको हात्तीबाङ स्कुलका प्रधानाध्यापक लोकबहादुर मगरले जानकारी दिए ।
डा.प्रमोद पौडेलका अनुसार जंगली च्याउमा एमेनिटा भन्ने बीस हुन्छ । यसले कलेजोमा असर गर्छ र केलेजो फेल हुने समस्या हुन्छ । बिस्तारै दिमागमा असर गर्ने, बेहोस हुने, मृगौलामा पनि असर गर्ने हुँदा बिरामीको मृत्यु हुने गरेको छ ।
