काठमाडौं,माघ २० ।
राष्ट्रिय स्वतन्त्र पार्टी (रास्वपा) का सभापति रवि लामिछानेले चुनावी घरदैलोमा जाने तयारी गरेका छन् ।
खुट्टाको समस्याका कारण केही दिन ढिलो गरी घरदैलो अभियान सुरु गर्न लागेको उनका स्वकीय सचिव अविनाश आचार्यले जानकारी दिए ।
उनका अनुसार, रवि आज फलोअपमा अस्पताल जाँदै छन् ।
“आज सभापतिज्यू, फलोअपका लागि अस्पताल जाँदै हुनुहन्छ । अस्ति अस्पतालबाट डिस्चार्ज हुने बेलामा केही दिनपछि हिँडडुल गर्न मिल्छ भन्नुभएको थियो । सोहीअनुसार भोलिदेखि नै आफ्नो निर्वाचन
क्षेत्रमा घरदैलो सुरु गर्ने तयारी गरेका छौँ,” आचार्यले भने ।
माघ ५ गते पहिलो चुनावी घोषणा सभाका लागि जनकपुरमा सहभागी हुने क्रममा लामिछानेको देब्रे खुट्टामा चोट लागेको थियो ।
औषधि सेवन गर्दा पनि निको नभएपछि उनी त्रिवि शिक्षण अस्पताल भर्ना भएका थिए । केही दिन अस्पताल बसाइपछि माघ १५ गते लामिछाने डिस्चार्ज भएका थिए ।
लामिछानेलाई ‘सेलुलाइटिस’ भएको थियो । उनका अनुसार, देशभर रास्वपाका उमेदवारले घरदैलो सुरु गरिसकेका छन् ।
लामिछाने चितवन क्षेत्र–२ का उमेदवार हुन् । कांग्रेसका तर्फबाट सो क्षेत्रमा मीना खरेल र नेपाली कम्युनिस्ट पार्टी (नेकपा) बाट प्रताप गुरुङ उमेदवार छन् ।
०७९ को आम निर्वाचनमा लामिछाने पहिलोपटक सोही निर्वाचन क्षेत्रबाट विजयी भएका थिए ।
तर, वैधानिकता सकिएको नागरिकता लिएको भन्दै सर्वोच्च अदालतको आदेशपछि उनको सांसद पद खारेज भएको थियो ।
त्यसपछि जिल्ला प्रशासन कार्यालय काठमाडौं गएर पुनः नेपाली नागरिकता लिएपछि लामिछाने ०८० वैशाखमा भएको उपनिर्वाचनमा पनि विजयी भएका थिए ।
लामिछाने दुईपटक गृहमन्त्रीसमेत बनिसकेका छन् । उनीमाथि संगठित अपराध, सम्पति शुद्धीकरण र सहकारी ठगीको मुद्दा लागेपछि पदमुक्त बनेका थिए ।
