चितवन, असार ६ –
पूर्वी चितवनको खैरहनीमा बाली उत्पादन पश्चात हुन सक्ने क्षति न्यूनीकरण सम्बन्धि तालिम सम्पन्न भएको छ ।
फलफूल तथा तरकारीजन्य बाली उत्पादन र बजारीकरणको समयमा हुन सक्ने क्षति न्यूनीकरण गर्ने उद्देश्यले सो तालिम आयोजना गरिएको आयोजकले जनाएको छ ।
खैरहनी नगरपालिकाको आयोजना तथा फलफूल तथा तरकारी मुल्य श्रृङ्खला VCDP को आर्थिक सहयोगमा संचालित उक्त तालिममा १२५ जना कृषकहरुको सहभागिता रहेको थियो । खैरहनी १,२,४,५,६ का कृषकहरु सम्मिलित उक्त तालिममा बालीको प्रकृति अनुसारको टिपाइ, भण्डारण र प्याकेजिङ्ग गर्ने तरिकाहरु सिकाइएको थियो ।
यस अघि रत्ननगर नगरपालिकाको पाँच ओटा वडाका किसानहरुका लागि यसै प्रकृतिको तालिम संचालन गरिसकेको र छिट्टैनै राप्तिमा पनि यस्तै तालीम संचालन गरिने VCDP का कृषि अधिकृत राम थापाले बताउनु भयो ।
तरकारी तथा फलफूल उत्पादन पश्चात् टिपाई र प्याकेजिङ्ग गर्ने सहि तरिका नजान्दा किसानहरुले १० देखि ३० प्रतिशतसम्म नोक्सानी व्यहोर्ने गरेको तालिमका प्रशिक्षक तथा खैरहनी नगरपालिका कृषि शाखा प्रमुख दिपेन्द्र अर्यालले बताउनुभयो । बाली भित्र्याउने समयमा भण्डारण गर्ने तरिका नजान्दा किसानहरुले लाखौं नोक्सानी व्यहोरेको उनको दाबी छ ।
कृषि प्राविधिक यमुना सापकोटाले सहजीकरण गर्नुभएको उक्त तालिममा दिपेन्द्र अर्याल, राम थापा, ध्रुव आचार्य, नित्या दाहाल लगायतले प्रशिक्षण दिनुभएको थियो ।