काठमाडौं भदौ २७
नेपाली राष्ट्रिय क्रिकेट टिमका बलर ललितनारायण राजवंशीले ‘अन्तर्राष्ट्रिय क्रिकेटका लागि आफूसँग क्रिकेट ब्याट नभएको’ विषयमा प्रतिक्रिया जनाएका छन् ।
मंगलबार राति सामाजिक सञ्जालमा एक लामो पोस्ट गर्दै ललितले एक अन्तर्वार्ताका दौरान आफूले किट्स स्पोन्सर नहुँदा आफैँले सबै कुरा व्यवस्थापन गर्न गाह्रो भएको आशयमा प्रतिक्रिया दिएको जनाएका छन् । तर, क्रिकेट ब्याटमात्र समस्याको समाधान नभएको उनको भनाइ छ ।
“मबाहेक पनि थुप्रै राष्ट्रिय, अन्तर्राष्ट्रियस्तरमा खेलिरहनुभएका खेलाडीहरू प्रायोजकविहीन हुनुहुन्छ । कति क्षमतावान खेलाडीहरू किट्सकै अभावमा पलायन भएका छन्, हुने क्रममा छन् । मैले त जेनतेन व्यवस्था गरिरहेको छु , चलिरहेको छ तर समग्र यो क्षेत्रमा प्रतिभा भएका तर आर्थिक अवस्था कमजोर भएका खेलाडीहरूको के हुन्छ ?,” उनले भनेका छन् ।
