काठमाडौं भदौ १८
नेपाली राष्ट्रिय क्रिकेट टिमले सोमबार एसिया कप–२०२३ को आफ्नो दोस्रो खेलमा भारतविरुद्ध खेल्दै छ ।
श्रीलंकाको क्यान्डीस्थित पालेकेले अन्तर्राष्ट्रिय रंगशालामा हुने यो खेल नेपाली समयानुसार दिउँसो ३ः१५ बजे सुरु हुनेछ । तर, क्यान्डीमा वर्षाका कारण नेपाल र भारतबीचको खेल प्रभावित बन्न सक्ने सम्भावना उच्च छ ।
एक्यूवेदर डटकमका अनुसार आज दिनभर क्यान्डीको आकाश शतप्रतिशत नै बादलले ढाक्नेछ । दिउँसो ८९ प्रतिशत वर्षाको सम्भावना छ । जसमा ३.५ घण्टा पानी पर्ने अनुमान छ ।
यस्तै, साँझमा ६८ प्रतिशत वर्षाको सम्भावना छ । साँझमा करिब २.५ घण्टा पानी पर्ने अनुमान छ । यसैकारण यी दुई टिमबीचको खेल वर्षाका कारण रद्द हुन सक्ने सम्भावना उच्च छ ।
एकदिवसीय अन्तर्राष्ट्रिय क्रिकेटमा नेपालले पहिलोपटक भारतसँग खेल्न लागेको हो । प्रतियोगिताको समूह ‘ए’मा रहेका नेपाल र भारत दुवैको यो दोस्रो र ‘सुपर फोर’का लागि निर्णायक खेल हो । दुवै टिमलाई सुपर फोरमा प्रवेशका लागि जितको आवश्यकता छ । समूहमा दुवै टिम सुपर फोरका लागि खुला छन् । यसैकारण नेपाली टिम भारतविरुद्ध ऐतिहासिक जित निकाल्दै सुपर फोरमा स्थान पक्का गर्ने लक्ष्यमा हुनेछ ।
नेपाल पहिलो खेलमा पाकिस्तानसँग उसकै भूमिमा २३८ रनले पराजित भएको थियो । पाकिस्तानसँग पनि नेपालको यो पहिलो एकदिवसीय अन्तर्राष्ट्रिय क्रिकेट थियो । पाकिस्तानले प्रस्तुत गरेको ३४३ रनको लक्ष्य पछ्याउने क्रममा नेपाल २३.४ ओभरमा १०४ रनमै समेटिएको थियो ।
भारत भने समूह चरणको पहिलो खेलमा वर्षाले प्रभावित बन्यो । क्यान्डीमै शनिबार भारतले पाकिस्तानविरुद्ध २६७ रनको लक्ष्य प्रस्तुत गरेको थियो । तर, पहिलो इनिङपछि लगातार वर्षा भयो । दोस्रो इनिङ सम्भव हुन सकेन । यसैकारण दुवै टिमले एक/एक अंक पाए । त्यही एक अंकका कारण पाकिस्तानले सुपर फोरको यात्रा निश्चित गर्दा भारतलाई भने नेपालविरुद्ध जित्नैपर्ने समीकरण बनेको छ ।
