काठमाडौं वैशाख १८,
एसीसी प्रिमियर कपको फाइनल खेल वर्षाका कारण रोकिएको छ । त्रिवि क्रिकेट मैदान कीर्तिपुरमा आज बिहानदेखि जारी नेपाल र युनाइटेड अरब इमिरेट्स (यूएई) बीचको खेल रोकिएको हो ।
यसै वर्ष पाकिस्तानमा हुने एसिया कप खेल्ने लक्ष्य बोकेको नेपाली टिमले यूएईको सामना गरिरहेको छ ।
टस हारेर व्याटिङ गरेको यूइईले १५ ओभरको समाप्तिमा पाँच विकेट गुमाउँदै ५८ रन जोडेको छ ।
नेपालका करण केसीले दुई, सोमपाल कामी, ललित राजवंशी र सन्दीप लामिछानेले एक/एक विकेट लिए ।
प्रिमियर कपको उपाधि जित्ने टिमले एसिया कपमा भारत र पाकिस्तानसँगै समूह ‘ए’ मा स्थान पक्का गर्नेछ । नेपाल अहिलेसम्म एसिया कपमा छनोट हुन सकेको छैन ।
प्रतियोगिताको समूह ‘ए’ को विजेता बन्दै अन्तिम चारमा प्रवेश गरेको नेपालले सेमिफाइनलमा कुवेतलाई समूह चरणकै नतिजाका आधारमा पछि पारेर फाइनलमा स्थान सुरक्षित गरेको थियो ।
यता, समूह ‘बी’ को विजेताको रुपमा सेमिफाइनल आएको यूएईले त्यहाँ ओमानलाई डकवर्थ लुईस पद्दतिअनुसार दुई रनले हराउँदै नेपालसँगको उपाधि भिड्न्त पक्का गरेको थियो ।
