चितवन, वैशाख ६–
चितवनको भरतपुर महानगरपालिका–१५, मा निर्माण भइरहेको गौतमबुद्ध अन्तर्राष्ट्रिय क्रिकेट रंगशालाको भौतिक प्रगति ५० प्रतिशत पुगेको छ । रंगशालामा मैदान बनाउन काम सुरु भएको छ । वर्षा अघि नै मैदानमा बर्मुडा घाँस रोप्ने तयारी छ । सम्झौताअनुसार निर्माणको काम सक्न अब ९ महिना मात्र बाँकी छ ।
भरतपुर महानगरपालिकाले बागमती प्रदेशको साझेदारीमा निर्माण गरिरहेको गौतमबुद्ध अन्तर्राष्ट्रिय क्रिकेट रंगशालामा मैदान निर्माणको काम सुरु गरिएको छ । वर्षायाम सुरु हुनअघि नै मैदानमा बर्मुडा घाँस रोप्ने तयारी छ । त्यसका लागि अहिले मैदान सम्याउने, पानी निकासका लागि ड्रेनेज पाइप राख्ने काम भइरहको छ । नयाँ प्रविधिमा आधारित रहेर स्तरीय मैदान निर्माण भइरहेको रंगशाला निर्माण कम्पनी कालिञ्चोक बीबीआर जेभीका प्रोजेक्ट म्यानेजर धर्मेन्द्र गुप्ताले बताए ।
२०८१ असार २३ गते भरतपुर महानगरपालिका र हिमालयन कालिञ्चोक बीबीआर जेभीले सम्झौता गरेपछि भदौदेखि रंगशालाको निर्माणको काम अघि बढेको थियो । त्यसअघि धुर्मुुस–सुन्तली फाउण्डेसनले आर्थिक अभाव देखाउँदै रंगशाला निर्माणबाट हात झिकेको थियो । त्यसपछि रंगशाला लामो समय अलपत्र रह्यो । महानगरले बागमती प्रदेश सरकारसँग मिलेर ७८ करोड ५० लाख लागतमा रंगशाला निर्माण अघि बढाएपछि अहिले प्याराफिट निर्माण, दुई वटा भीआइपी टावर र मैदान निर्माण निर्माणको काम भइरहेको हो । प्याराफिटका चारमध्ये ३ वटा ब्लक बनिसकेका छन् । भीआइपी टावरको दुई तलाकै ढलान सम्पन्न भइसकेको छ भने भित्री कामहरू पनि सकिनै लागेका छन् । अहिले समग्रमा भौतिक प्रगति ५० प्रतिशत पुगेको भरतपुर महानगरपालिकाका सिनियर डिभिजन इन्जिनियर सन्तोष आचार्यले जानकारी दिए ।
पहिलो चरणको कामको सम्झौताअनुसार रंगशालामा १५ हजार क्षमताको प्याराफिट, अन्तर्राष्ट्रिय मापदण्डको मैदान र पीच, दुई वटा भीआइपी टावर, स्कोर बोर्ड रहने छ । यो सम्झौताको निर्माण सम्पन्न हुँदा रंगशालामा प्याराफिटमा कुर्ची र फ्लड लाइट हुने छैन । रंगशालालाई पूर्ण अन्तर्राष्ट्रियस्तरको बनाउन फ्लड लाइट र प्याराफिटमा कुर्ची आवश्यक पर्ने भएकाले ती पूर्वाधार निर्माणका लागि महानगरले संघीय सरकारको सहयोग चाहेको छ । त्यसका लागि सबै इस्टिमेटसहित छिट्टै आउँदो आर्थिक वर्ष २०८३/८४ का लागि संघीय र प्रदेश सरकारसँग बजेट माग गर्ने महानगरको तयारी भइरहेको महानगरका कार्यवाहक प्रमुख चित्रसेन अधिकारीले जानकारी दिए ।
सम्झौताअनुसार रंगशाला निर्माण कम्पनीले आउँदो पुस मसान्त भित्रमा रंगशाला निर्माण सम्पन्न गरी महानगरलाई बुझाउनुपर्ने छ ।
