चितवन, फागुन ९ –
गैंडाकोट नगरपालिकाले निकासी कर असुल्न पूर्वपश्चिम राजमार्गमा स्थापना गरेको ढाटले मनपरी ढंगले राजमार्गमा गुड्ने सबै सवारीसँग अवैधरुपमा रकम असुली रहेको समाचार प्रकाशन भएपछि ढाट नै बन्द भएको छ ।
हेरौं, यससम्बन्धि चितवन आजकर्मी समेत रहेका पत्रकार – हिरालाल आचार्य ‘डायण्मड’ ले तयार पारेको समाचार सामग्री ।
यसअघि गैंडाकोट नगरपालिकाले पूर्वपश्चिम राजमार्गमा राखेको ढाटले मनपरी ढंगले जथाभावी रकम असुली गरिरहेको रिर्पाेट प्रसारण गरेका थियौं ।
नगरपालिकाले आर्थिक वर्ष २०७९/०८० का लागि नगरक्षेत्रभित्र कवारी कर संकलन गर्न श्री गैंडाकोट बिल्डर्स एण्ड सप्लायर्स प्रालि गैंडाकोट, (नवलपरासी–बर्दघाटसुस्तापूर्व) सँग सम्झौता गरेको थियो ।
गैंडाकोटमा उत्पादन भई बाहिर निकासी हुने कवाडीजन्य २१ वटावस्तुहरुमा कर उठाउन पाउने गरी स्थापित ढाटले मनपरी ढंगले पूर्वपश्चिम राजमार्गमा गुड्ने मालबाहक सवारीसँग कर उठाइरहेको पाइएपछि हाम्रो टिम मालबाहक सवारी साधनमै चढेर क्रस चेक समेत गरेको थियो ।
जसक्रममा उक्त ढाटले पूर्वपश्चिम राजमार्गमा गुड्ने सबै सवारीसँग मनपरी ढंगले रकम असुलि गरिरहेको तथ्या फेला परेको थियो । उक्त समाचार गएको आइतबार साँझ ग्योलक्सी फोर के टेलिभिजन सिधा कुरा र सोमबार बिहान विभिन्न राष्ट्रिय तथा स्थानीय सञ्चार माध्यममा आएपछि सोमबार दिउँसोबाट ढाट नै बन्द भएको छ । ढाट रहेको स्थानका बोर्डहरु हटाइएका छन् । ढाटमा रहेको एउटा घुम्ति बन्द गरिएको छ । सवारी साधनहरुलाई रोक्न कोही पनि खटिएका छैनन् ।
पहिला रकम बुझाइरहेका सवारी साधनहरु ढाटमा आइसकेपछि बिस्तारै चलाउने र ढाटमा कोही नदेखेपछि जाने गरेको दृश्य आज देखियो ।
समाचार आएर ढाटको चौतर्फि विरोध हुन थालेपछि ठेकेदार कम्पनी आफैले ढाट बन्द गराएको हो । ढाटका सञ्चालक कृष्ण सिग्देलले आफूलाई ढाटबाट अनावश्यक तनाव भएकोले बन्द गरेको जानकारी दिए । नगरपालिकासँग सम्झौता गरेर काम गर्दा पनि पुलिस, सिडियोदेखि सबैले फोन गरेर तनाव दिएकाले ढाट नै बन्द गरिदिएको उनको प्रतिक्रिया छ ।
आफूले नगरपालिकालाई ८ लाख बुझाएर २ महिना अघि ढाट खोलेको बताउँदै उनले नगरपालिकासँग बुझाएको पैसा फिर्ता दिनका लागि आग्रह गर्ने समेत बताएका छन् ।
निकासी कर उठाउने भनि सम्झौता गर्ने अनि अवैधरुपमा राजमार्गमा गुड्ने सबै सवारीसँग पैसा अुसुलेको गैंडाकोट बिल्डर्सलाई नगरपालिकाले के कारबाही गर्छ भन्ने हेर्न बाँकी छ । राजमार्गमा गुड्ने सबै ससारीसँग अवैधरुपमा रकम असुल्न नपाइने भएपछि गैंडाकोटबाट निकासी हुने सवारी साधनको करले मात्र कमाई नहुने देखेर ठेकेदार कम्पनीले ढाट बन्द गराएको स्पष्ट बुझिन्छ ।
सरकारी बिदा मात्र परेकाले यसबारे कुनै निर्णय भइ नसकेको नगरपालिकाका प्रवक्ता शिवकान्त तिवारीले बताए ।
यसअघि चितवन आजमा प्रकाशित समाचार :
