संयोग भनौँ, या नियतिको खेल, पाँच वर्ष अघि हारेका माओवादीका कृष्ण रानामगर अहिले जिते, पाँच वर्ष अघि जितेका कांग्रेसका राजनराज पन्त अहिले हारे । अघिल्लो चुनावमा पन्तले ६ हजार ५६० मत ल्याएर जितेका थिए भने उपविजेता बनेका रानाले ५ हजार २६ मत पाएर हारेका थिए । पाँच वर्ष बित्यो रानामगरले पासा पल्टाए । अनि, जित आफ्नो पोल्टामा पारे ।

अन्तत : नेपाली कांग्रेसका निकटतम प्रतिस्पर्धी तथा निवर्तमान मेयर पन्तलाई हराउँदै गोरखा नगरपालिकाको मेयरमा नेकपा माओवादी केन्द्रका रानामगर निर्वाचित बनेका छन् । यस गरपालिकामा १४ वटा वडा रहेको छ । तर, रानामगरले १ देखि १३ वटा वडाको नतिजा सार्वजनिक हुँदा नै जितलाई सुनिश्चित गरेका छन् ।

१३ वटा वडाको नतिजा सार्वजनिक हुँदैमा ८ हजार २९५ मतका साथ अग्रता कायम राख्दै जित सुनिश्चित गरेका हुन् । तर, अन्तिम मतपरिणाम भने सार्वजनिक भएको छैन । उपविजेता बनेका पन्तले ६ हजार ४५६ मतका साथ पछ्याउँदै छन् । राना र पन्तको मतान्तर १ हजार ८३९ रहेको छ । वडा न १४ मा १ हजार ४०१ मत गन्न बाँकी छ ।- न्युज कारखाना