काठमाडौं जेठ १,
राष्ट्रिय स्वतन्त्र पार्टी (रास्वपा)ले अन्तर्राष्ट्रिय समुदायमा नक्कली भुटानी शरणार्थी प्रकरणले नेपाल र नेपालीको छविमा आँच पुर्याएको टिप्पणी गरेको छ ।
सोमबार पार्टी महामन्त्री मुकुल ढकालले विज्ञप्ति जारी गर्दै शरणार्थी प्रकरणले विश्वसामु स्वाभिमानी नेपालीको शिर झुकाएको भन्दै संलग्न जोसुकै भए पनि कुनै पनि हालतमा छाड्न नहुने बताएका हुन् । उनले यसका घटनाक्रमलाई आफूहरूले सुक्ष्म ढंगले नियालिरहेको पनि बताएका छन् ।
उनले हालसम्म सरकार र नेपाल प्रहरीले उठाएका कदमप्रति पार्टीको साथ र समर्थन रहेको बताएका छन् ।
“यो प्रकरण केवल भ्रष्टाचारको मुद्दा होइन । एक संगठित ठगी, राज्यविरुद्ध अपराध हो, राष्ट्रघाती कार्य हो । यो मानव तस्करीको नवीन रूप हो, ठगी हो तथा भ्रष्टाचारविरुद्धको संयुक्त राष्ट्र संघीय महासन्धि, अन्तरदेशीय संगठित अपराधविरुद्धको संयुक्त राष्ट्र संघीय महासन्धिलगायतका अन्तर्राष्ट्रिय सन्धि सम्झौता समेतको उल्लङ्घन हो,” विज्ञप्तिमा भनिएको छ ।
रास्वपाले प्रकरणमा संलग्नहरूको राहदानी जफत गरी मुलुक बाहिर जानबाट रोक्न पनि माग गरेको छ । साथै उसले यस प्रकरणमा पीडित पक्षको ठगी भएको रकम पीडकबाट असुल उपर गराई फास्ट ट्रयाकमा क्षतिपूर्ति दिलाउनसमेत माग गरेको छ ।
