बदाम पोषण र थुप्रै स्वास्थ्य लाभहरूले भरिपूर्ण हुन्छ । हामी सबैलाई बदाम खान मन पर्छ, यो खान निकै स्वादिलो हुनुका साथै स्वास्थ्यका लागि पनि फाइदाजनक हुन्छ । तर, बदामबाट एलर्जी भएका मानिसहरूले यो खानु हुँदैन । यसलाई एक सुपरफुड मानिन्छ ।
यसमा एल्मोन्ड जत्तिकै पोषण हुन्छ । प्रोटिन, क्याल्सियम, फाइबर, म्याग्नेसियम, पोटासियम, भिटामिन ई र हेल्दी फ्याट प्रशस्त मात्रामा पाइन्छ । यसबाहेक यसमा जिङ्क, सेलेनियम र कपर प्रशस्त मात्रामा पाइन्छ । जसका कारण यसको सेवन शारीरिक स्वास्थ्यदेखि मानसिक, छाला र कपालको स्वास्थ्यमा निकै फाइदाजनक मानिन्छ ।
हामी सबैले बदामलाई भुटेर, आफ्नो पकवानमा समावेश गरेर, त्यसबाट बटर बनाएर धेरै तरिकाले प्रयोग गर्छौँ । तर के तपाईँले कहिल्यै पानीमा भिजाएर बदाम खानुभएको छ ? तर धेरैजसो मानिसहरूलाई थाहा छैन कि यदि तपाईँले रात भरी पानीमा भिजाएर बदाम राख्नुहुन्छ भने यसमा भएको एन्टी–न्युट्रियन्ट्स नष्ट हुन्छन् र यो पच्न सजिलो हुन्छ । यसो हुँदा स्वास्थ्यले पूर्ण लाभ पाउँछ ।
भारतकी क्लिनिकल न्युट्रिसनिष्ट तथा डायटिशियन गरिमा गोयलले पनि रात भरी भिजाएको बदाम बिहान खाँदा थुप्रै स्वास्थ्य लाभ पाउन सकिने बताएकी छिन् । यो लेखमा यसका पाँच फाइदाबारे कुराकानी गरिएको छ ।
भिजाएको बदाम खानुका फाइदा
१. स्वस्थ पाचनमा सुधार
बिहान भिजाएको बदाम खाँदा पाचन क्रियामा सुधार हुन्छ र पोषक तत्त्वको अवशोषण पनि राम्रो हुन्छ । यसले पेटको धेरै समस्याबाट पनि बचाउँछ ।
२. मांसपेशी बलियो बनाउँछ
प्रोटिनले भरपुर भएकोले भिजाएको बदाम खाँदा मांसपेशी बढाउन र विकास गर्न निकै फाइदाजनक हुन्छ । १०० ग्राम बदाममा लगभग २५ ग्राम प्रोटिन पाइन्छ । प्रोटिन स्वास्थ्यका लागि अत्यावश्यक पोषक तत्त्व हो ।
३. मुटुका लागि निकै लाभदायी
बदाम स्वस्थ फ्याटले भरिपूर्ण हुन्छ । यसले कोलेस्ट्रोल नियन्त्रण गर्न पनि मद्दत गर्छ । यसले मेटाबोलिजम बढाउन र रक्तसञ्चार बढाउन मद्दत गर्छ । जसले गर्दा मुटुलाई पर्याप्त पोषण मिल्छ र यसले राम्रोसँग काम गर्न सक्छ ।
४. मस्तिष्कका लागि लाभदायी
बदाम जस्तै भिजेको बदाम खाँदा पनि मानसिक स्वास्थ्यलाई बढावा दिन्छ । यसले स्मरण शक्ति बढाउनुका साथै दिमागलाई तीखो बनाउँछ ।
५. छाला र कपालको लागि पनि लाभदायक
बदाम छाला र कपालको लागि पनि धेरै लाभदायक छ । प्रोटिन र धेरै आवश्यक पोषक तत्त्वहरूले भरपुर भएकोले, यसले तपाईँलाई स्वस्थ छाला र कपाल प्राप्त गर्न मद्दत गर्दछ ।
