भरतपुर, २३ कार्तिक
भरतपुर अस्पतालमा सुत्केरी गराउन गएकी एक महिलाको मृत्यु भएको छ ।
बिहीबार दिउँसो सुत्केरी गराउन अस्पताल भर्ना भएकी ३० वर्षकी संगीता बिकलाई शनिबार राती ११:४० बजे भरतपुर अस्पतालका चिकित्सकले मृत घोषणा गरेका हुन् ।
संगीताको मृत्युपश्चात आफन्तले चिकित्सकको लापरबाहीका कारण ज्यान गएको भन्दै छानबिन र कारबाहीको माग गरेका छन् ।
पर्सा जिल्ला स्थायी ठेगाना भई हाल चितवनको कालिका नगरापालिकामा बस्दै आएकी संगीतालाई कार्तिक २० गते चेकजाँचका लागि भरतपुर अस्पताल ल्याइएको थियो । भिडियो एक्सरेमा बच्चाको धड्कन नभएको देखिएपछि चिकित्सकको सल्लाहमा उहाँलाई नर्मल डेलिभरीका लागि भर्ना गरिएको थियो । भर्नापछि उहाँलाई बेथा लगाउने औषधि चलाइएको थियो। कार्तिक २२ गते उनको अवस्था झन् बिग्रँदै गएको र रातको करिब ९ बजे आईसीयूमा सारिएकोमा ११ः४० मा मृत्यु भएको हो ।
अस्पतालका प्रवक्त समेत रहेका स्त्री तथा प्रस्तुती रोग विशेषज्ञ डा रामप्रसाद सापकोटाले भने उपचारमा कुनै लापरबाही नभएको दाबी गर्नुभएको छ । बिरामीको ज्यान ‘पल्मोनरी एम्बोलिजम’ प्राकृतिक जटिलताका कारण गएको स्पष्टीकरण दिनुभएको छ ।
बिरामीलाई पानी बग्न थालेको दिउँसो १ बजेबाट भए पनि साँझ ७ बजे अस्पताल ल्याइएको उहाँको भनाइ छ । पानीको मात्रा कम देखिएपछि सुरुमा बच्चालाई बचाउन अपरेसन गर्ने तयारी गरिएको थियो। तर, अपरेसन कक्षमा लैजानुअघि नै जाँच गर्दा बच्चाको धड्कन बन्द भइसकेको थियो ।
बच्चाको मृत्यु भइसकेपछि आमालाई शल्यक्रियाको अनावश्यक जोखिमबाट जोगाउन नर्मल डेलिभरीको प्रयास गरिएको उहाँको भनाइ छ । औषधि चलाएकै क्रममा संगीता अचानक ढलेपछि संगीतालाई ’कार्डियाक अरेस्ट’ भएको पत्ता लाग्यो र सीपीआर गरेर बचाउने प्रयास गरिएको थियो । सिपीआर पश्चात होसमा आएपछि आईसीयूमा सारिएपछि मुटुको जाँच गर्दा फोक्सोको नशामा रगत जम्ने ’म्यासिभ पल्मोनरी एम्बोलिजम’ भएको देखिएको उहाँको भनाइ छ । यो अवस्थामा मातृ मृत्युदर एकदमै उच्च हुने डा सापकोटा बताउँनुहुन्छ । ।
चिकित्सकले आवश्यक इन्डिकेसन नभई अपरेसन गर्नु झन् जोखिमपूर्ण हुने भन्दै बिरामीको व्यवस्थापनमा अस्पतालको तर्फबाट कुनै त्रुटि नभएको दाबी डा सापकोटाको छ । घटनालाई लिएर अस्पताल परिसरमा आफन्त र प्रशासनबीच तनाव कायम रहेको छ ।
संगीताको परिवारले अस्पतालले लापरबाही गरेको भन्दै शव बुझ्न मानेका छैनन् । ३० वर्षीया संगीताको अहिलेको गर्भ पाँचौ हो । यसअघि जन्माएका एक छोरी र दुई छोरा छन् भने एउटा गर्भ खेर गएको अस्पतालको रेकर्डमा उल्लेख छ ।
