काठमाडौं असोज ३०
अमेरिकी राष्ट्रपति डोनाल्ड ट्रम्पले इसराइलले फेरि गाजामा आक्रमण गर्न सक्ने चेतावनी दिएका छन् । अमेरिकी टेलिभिजन नेटवर्क सीएनएनसँगको कुराकानीमा ट्रम्पले आफूले अनुमति दिए इसराइलले पुनः गाजामा हमासलक्षित सैन्य कारबाही चलाउन सक्ने चेतावनी दिएका हुन् ।
यदि हमासले युद्धविराम सम्झौता अन्त्यलाई समर्थन गर्न अस्वीकार गरेमा इजरायली प्रधानमन्त्री बेन्जामिन नेतान्याहूलाई गाजामा सैन्य कारबाही पुनः शुरू गर्न अनुमति दिने उनको भनाइ छ । आफूले भन्नेवित्तिकै इजरायली सेनाहरू सडकमा फर्कने ट्रम्पले बताए ।
इसराइलले हमासमाथि युद्धविराम उल्लंघन गरेको आरोप लगाएको छ । सम्झौताअनुसार हमासले ७२ घन्टाभित्र सबै जीवित बन्धक र मृत्यु भएकाहरूको शव फिर्ता गर्नुपर्ने भनिएको थियो । तर, हमासले मृत्यु भइसकेका सबै बन्धकहरूको शव अझै फिर्ता गरेको छैन ।
हमासले अहिलेसम्म ८ वटा शव इसराइललाई हस्तान्तरण गरेको छ । हमासले बाँकी मृत बन्धकको शव हस्तान्तरण गर्न समय लाग्ने बताएको छ ।
ट्रम्पकै २० बुँदे प्रस्तावमा टेकेर गत बिहीबार गजामा युद्धविराम घोषणा भएको थियो । त्यसपछि सोमबार हमासले सबै जीवित बन्धकहरूलाई मुक्त गरेको थियो ।
युद्धविराम भएपछि गजामा हजारौं प्यालेस्टिनीहरू फर्किएर खण्डहर बनेको क्षेत्रमै बस्न थालेका छन् ।
