काठमाडौं भदौ २०,
श्रीलंकाको दक्षिणी प्रान्त उवाको बादुल्ला जिल्लामा भएको सवारी दुर्घटनामा परी कम्तीमा १५ जनाको ज्यान गएको छ । दुर्घटनामा १५ जनाभन्दा बढी घाइते भएका छन् ।
प्रहरीका अनुसार, बिहीबार राति ९ बजेतिर दक्षिणी सहर तांगालेबाट ३० जनाभन्दा बढी मानिस पिकनिकका लागि निस्किएका थिए । एला सहरनजिकै उनीहरूको बस एक हजार फिटभन्दा गहिरो खाडलमा खसेको थियो ।
समाचारका अनुसार, बस अगाडिबाट आइरहेको एउटा जीपसँग ठोक्किएर सडकको रेलिङ पार गरी तल खसेको थियो । मृत्यु हुनेमा नौजना महिला छन् । उनीहरू सबै तांगाले सहरी परिषद्का कर्मचारी थिए ।
