काठमाडौँ,१ साउन
बंगलादेशका सुरक्षाकर्मी र निवर्तमान प्रधानमन्त्री शेख हसिनाका समर्थकहरूका बीच झडप भएपछि कम्तीमा चारजनाको मृत्यु भएको छ । अन्य कैयौं घाइते भएका छन् ।
हसिनाको पुर्ख्यौली घर रहेको गोपालगञ्ज जिल्लातिर विद्यार्थीहरूको जुलुस लैजाँदै गर्दा हिंसा भएको थियो । त्यो अवामी लीगको पकडक्षेत्र हो । त्यहाँ नै हसिनाका पिता मुजिबुर रहमानको चिहान पनि रहेको छ ।
हसिनालाई सत्ताच्युत गर्नका लागि आन्दोलन चलाएको नेशनल सिटिजन पार्टीका विद्यार्थी नेताहरू गोपालगञ्जमा प्रदर्शन गर्न गएका थिए ।
विद्यार्थी नेताहरू बोकेको गाडीमा हसिना समर्थकहरूले आगो लगाएका थिए । उनीहरूले प्रहरीलाई पनि लट्ठीले हिर्काएको भिडियोमा देखिन्छ ।
झडप भएपछि गोपालगञ्जमा बुधवार राति कर्फ्यु लगाइएको थियो ।
हसिनालाई ११ महिनाअघि अपदस्थ गरिएको थियो । त्यसपछि बंगलादेशमा अव्यवस्था छाएको छ र भीडले हिंसा चर्काइरहेको छ ।
बुधवार भएको आक्रमणले पनि देशमा गहिरो विभाजनहरू रहेको पुष्टि हुन्छ । अन्तरिम सरकारले बिग्रिरहेको सुरक्षा व्यवस्थालाई नियन्त्रण गर्न सकेको छैन ।
पछि ती नेताहरूलाई प्रहरीले सुरक्षा दिएर अन्यत्र लगेको थियो ।
अन्तरिम सरकारले विद्यार्थीहरूमाथिको आक्रमणका दोषीहरूलाई दण्डित गर्ने जनाएको छ । अन्तरिम सरकारका प्रमुख मोहम्मद युनुसले गोपालगञ्जमा भएको हिंसालाई कुनै हालतमा पनि प्रतिरक्षा गर्न नसकिने बताएका छन् ।
हसिनाको अवामी लीग पार्टीलाई अधिकारीहरूले गत मे महिनामा प्रतिबन्ध लगाएका थिए । त्यस दलले हिंसाको भर्त्सना गर्दै हत्याका लागि अन्तरिम सरकारलाई दोष लगाएको छ ।
युनुस सरकारले सुरक्षा व्यवस्था कायम गर्ने भनी प्रतिबद्धता व्यक्त गरेको भए पनि समाजमा ध्रुवीकरण बढिरहेकाले राष्ट्रिय मेलमिलापको सम्भावना सकिएको आलोचकहरू बताउँछन् । परिस्थितिमा सुधार नआएमा लोकतन्त्रतर्फको शान्तिपूर्ण यात्रा खतरामा पर्ने उनीहरूको भनाइ छ ।
नोबेल शान्ति पुरस्कार विजेता युनुसले हसिना देशबाट पलायन भएको तीन दिनपछि सत्ता चलाउन थालेका थिए । उनले शान्ति व्यवस्था कायम गर्ने प्रतिबद्धता व्यक्त गरेका थिए ।
सन् २०२७ को अप्रिलमा आम निर्वाचन गर्न उनले प्रतिज्ञा गरेका छन् ।
हसिनामागि मानवताविरुद्धको अपराधको आरोप लगाइएको छ । बंगलादेश सरकारले हसिनालाई आफूकहाँ बुझाउन भारत सरकारलाई आग्रह गरेको भए पनि भारतले त्यसमा प्रतिक्रिया दिएको छैन ।
एजेन्सी
