– हिरालाल आचार्य ‘डायमण्ड’
चितवन, जेठ २१ –
एसइईको परीक्षाको कापी जाँचेको शुल्क बढाउनुपर्ने माग राख्दै चितवनका शिक्षकहरुले जिल्ला शिक्षा समन्वयन इकाइ चितवनलाई ज्ञापनपत्र बुझाएका छन् ।
निजी तथा सामुदायिक विद्यालयका शिक्षकहरुले आज भरतपुर माविमा एक कार्यक्रमका बीच जिल्ला समन्वयन इकाइका परीक्षा इकाइ प्रमुख रुद्र पौडेललाई ज्ञापनपत्र बुझाएका हुन् । परीक्षा नियन्त्रण कार्यालय सानोठिमी भक्तपुरमामा ध्यानाकर्षण गराउन आग्रह गर्दै पौडेललाई ज्ञापनपत्र बुझाइएको हो ।
अहिले एसइईको कापी जाँचेको शुल्क प्रति कापी २४ रुपैयाँ र समपरीक्षण गरेको शुल्क ६ रुपैयाँ रहेको छ । आफूहरुले मूल्य अभिवृद्धि कर कट्टी गरी प्रति कापीको शुल्क ३० रुपैयाँ बनाउन माग गरेको कापी परीक्षक एवम् टे«ड युनियन चितवनका सहसचिव रामनिधी पन्तले बताए ।
मंहगी बढिरहेको र ३ वर्षदेखि एउटै शुल्क कायम रहेकाले शुल्क बढाउन माग गरिएको अर्का कापी परीक्षक लेखनाथ अधिकारीले बताए ।
ज्ञापन पत्र बुझाएर आफ्नो माग राखिएको र कापी जाँच भने जारी राख्ने शिक्षकहरुले बताएका छन् । परीक्षा नियन्त्रण कार्यालय सानोठिमी भक्तपुरलाई सम्बोधन गरी लेखिएको पत्रमा १०९ जना कापी परीक्षक शिक्षकहरुले हस्ताक्षर गरेका छन् ।
चितवनमा एसइईको कापी परीक्षण केन्द्र भरतपुर माविलाई तोकिएको छ । जिल्लाभरबाट करिब १३५ जना शिक्षकहरु भरतपुर माविमा आएर नियमित कापी जाँच गरिरहेका छन् । देशभर जम्मा ३६ वटा परीक्षण केन्द्रहरु रहेका छन् ।
एउटा कापी जाँच्न विषय र अक्षर हेरेर १५ देखि ३० मिनटसम्म लाग्ने गरेको कापी परीक्षक लेखनाथ अधिकारी बताउँछन् ।
ज्ञापनपत्र बुझ्दै जिल्ला शिक्षा समन्वयन इकाइका परीक्षा इकाइ प्रमुख रुद्र पौडेलले पत्रलाई उच्च महत्वका साथ सम्बन्धित निकायसम्म पु¥याउने प्रतिवद्धता व्यक्त गरे ।
हेर्नुहोस्, बुझाइएको ज्ञापन पत्र :