स्वच्छता– हिरालाल आचार्य ‘डायमण्ड’
चितवन, जेठ १८
चितवनमा साताव्यापी रुपमा विश्व खाद्य स्वच्छता दिवस मनाउन सुरु गरिएको छ । खाद्य प्रविधि तथा गुण नियन्त्रण डिभिजन कार्यालय चितवनले आजदेखि साताव्यापी रुपमा दिवस मनाउन सुरु गरेको छ ।
आज पहिलो दिन सञ्चारकर्मीहरुको भेला गर्दै कार्यालयले सञ्चारमाध्यमबाट जनचेतना फैलाउन अनुरोध गरेको छ । सञ्चारकर्मीहरुसँग कुरा गर्दै कार्यालयका प्रमुख एवम् खाद्य अनुसन्धान अधिकृत घननाथ अधिकारीले विश्व खाद्य स्वच्छता दिवसका अवसरमा खाद्य प्रविधि तथा गुण नियन्त्रण विभागको आग्रहमा चितवनमा पनि विभिन्न कार्यक्रम गरी दिवस मनाउन लागिएको बताए ।
साताव्यापी कार्यक्रममा होटल तथा पसलहरुमा अनुगमन तथा निरीक्षणका कार्य हुने उनले बताए । २० गते स्थानीय जनप्रतिनिधिहरु सामु अन्र्तक्रिया कार्यक्रम राखिएको उनले जानकारी दिए । ‘स्वच्छ सन्तुलित आहार, स्वस्थ जीवनको आधार’ भन्ने नाराका साथ यस वर्ष खाद्य स्वच्छता दिवस मनाउन लागिएको हो ।
सन् २०१८ डिसेम्बर २० तारिखका दिन संयुक्त राष्ट्रसङ्घको महासभाले हरेक वर्ष जुन ७ का दिन विश्व खाद्य स्वच्छता दिवस मनाउने निर्णय गरेको थियो । त्यसयता सन् २०१९ देखि हरेक वर्ष विश्व खाद्य स्वच्छता दिवस मनाइन्छ ।
खाद्य स्वच्छताका लागि बिउ लगाउँदादेखि पकाएर खाउनजेलसम्मै विभिन्न चरणमा सबैले उत्तिकै ध्यान दिन आवश्यक रहेको खाद्य विज्ञ अधिकारी बताउँछन् । उनका अनुसार स्वच्छ खाना खाने वातावरण बनाउनका लागि किसानले खेती गर्दा आफ्नो मापदण्ड पूरा गर्नुपर्छ । विषादी तथा रासायनिक मलको प्रयोग गर्दा विशेष सतर्कता अपनाउनुपर्छ । यसैगरी थन्काउने बेला होस् वा प्याकेजिङ्ग गर्ने बेला । अनि पकाउने बेलामा पनि त्यसैगरी ध्यान दिनुपर्छ । अनि खानेबेला पनि हात धुने लगायतका कुरामा ध्यान दिनुपर्छ ।
अधिकारीले कतै अद्याद्य वस्तु तथा म्याद नागेका वस्तु पाइएमा तत्काल खबर गर्न आग्रह गरेका छन् । उनले मालपोतचोकमा अवस्थित खाद्यको कार्यालयमा आएर तथा कार्यालयको नम्बर ०५६–५९८०४५ र इमेल chitwanftqcdo@gmail.com मा इमेल गरेर तथा स्थानीय प्रशासनमा खबर गरेर जानकारी गराउन तथा उजुरी दिन पनि आग्रह गरेका छन् ।
उनले उपभोक्ताको स्वास्थयमा खेलबाड गर्ने अधिकार कसैलाई नभएको बताउँदै यसो भएको पाइएमा कानुनी कारबाही गर्ने प्रावधान भएकाले सबैलाई सचेत हुन आह्वान गरेका छन् ।
खाद्य प्रविधि तथा गुण नियन्त्रण कार्यालयले विभिन्न सचेतना मूलक ब्यानरहरु पनि बनाएको छ । जसलाई हामीले यहाँ प्रस्तुत गरेका छौं । खाद्य स्वच्छताका लागि यी ब्यानर एक पटक अवश्य पढौं र अरुलाई पनि पढ्न लगाऔं ।
