काठमाडाैं असोज २५,
लेबनानको राजधानी बेरुतमा इजरायलले बिहीबार साँझ गरेको विशाल हवाई हमलामा २२ जनाको मृत्यु भएको छ ।
लेबनानको स्वास्थ्य मन्त्रालयका अनुसार उक्त हमलामा २२ जनाको मृत्यु तथा ११७ जना घाइते भएका छन्।
बेरुतको सानो शिया इलाका बाचौरामा विस्फोटको ठूलो आवाज सुनिएको थियो ।
घाइतेहरूलाई अमेरिकन युनिभर्सिटी अस्पतालमा उपचारका लागि पठाइएको छ ।
सो आक्रमणको मुख्य टार्गेट हिजबुल्लाहका सुरक्षा अधिकारी वफिक सफा हुन सक्ने बताइएको छ ।
वफिक केही दिनअघि हत्या गरिएका हिजबुल्लाहका नेता हसन नसरल्लाहका सम्धी हुन् । यसबारे हिजबुल्लाहले कुनै टिप्पणी गरेको छैन ।
इजरायली हवाई आक्रमणले बाचौराका २ बाक्लो बस्ती नुवेइरी र बस्तामा रहेका आवासीय भवनहरूमा क्षति पुर्याएको छ।
तीव्र आक्रमणको शृंखलापछि बेरूतमा केही दिनयता शान्ति थियो, तर अचानक भएको यस आक्रमणले पुनः तनाव फैलिएको छ।
इजरायली सुरक्षा बल (आईडीएफ) ले यसबारे कुनै वक्तव्य दिएको छैन।
यो इजरायलले राजधानीको दक्षिणी उपनगरबाहिर गरिएको तेस्रो हवाई आक्रमण हो, जहाँ यसअघि पनि हिजबुल्लाहका कमान्डरहरू मारिएका थिए र हातहतियारका गोदाम नष्ट भएका थिए ।
