चितवन, असोज १८ –
चितवन–२ का सांसद तथा राष्ट्रिय स्वतन्त्र पाटी (रास्वपा)का सभापति रवि लामिछानेविरुद्ध चितवनमा प्रदर्शन भएको छ ।
आज शुक्रबार दिउँसो उनकै निर्वाचन क्षेत्रअन्तर्गत पर्ने इच्छाकामना गाउँपालिकाको मुग्लिन बजारमा विरोध प्रदर्शन भएको हो ।
सहकारीपीडितलाई न्याय दे, सहकारीको बचत फिर्ता गर, सहकारी ठग मुर्दावाद भन्ने नारा लगाउँदै लामिछानेविरुद्ध प्रदर्शन भएको हो ।
रवि लामिछनेले चितवन २ मा सार्वजनिक सुनूवाइ कार्यक्रम गर्दै आएका छन् । मुग्लिन बजारमा उनले तेस्रो सार्वजनिक सुनुवाइ कार्यक्रम समेत आज सम्पन्न गरेका छन् । सार्वजनिक कार्यक्रम सकेर फर्कने क्रममा लामिछानेविरुद्ध प्रदर्शन भएको हो । प्रदर्शनकारीहरु कालो ब्यानरसहित नाराबाजीमा उत्रिएका थिए ।
प्रदर्शनस्थलमा भने रवि लामिछाने नआई वैकल्पिक बाटोबाट गएका छन् । प्रदर्शनकारी र रास्वपा समर्थकबीच केही विवाद र धकेलाधकेल पनि भएको थियो ।
चितनवको साहारा चितवन बहुउद्देश्यीय सहकारीबाट करिव १३ करोड बराबरको रकम गोरखा मिडियामा गएको छ । सहकारी पीडितले पटक पटक रविलाई भेट गरेर समस्या समाधान गर्न आग्रह गरे पनि बचत फिर्ता पाउन सकेका छैनन् ।
