सुविधाथैली खारेज गरे पनि स्वास्थ्य बिमा कार्यक्रमबापत बोर्डले अस्पताललाई करोडौं रकम तिर्न बाँकी हुँदा समस्या कायमै रहेको अस्पतालका निर्देशक डा। गुरुङले बताए ।

उनका अनुसार बिमा बोर्डले यो अस्पताललाई ६९ करोड रूपैयाँ भुक्तानी गर्न बाँकी रहेको छ । अस्पतालले स्वास्थ्य बिमा कार्यक्रम सुरु गरेको समय २०७७ सालदेखि यताको भुक्तानी थपिँदै गएर ६९ करोड रूपैयाँ बाँकी भएको डा. गुरुङले जानकारी दिए ।

भुक्तानी गर्न बाँकी रकममध्ये २० करोड रूपैयाँको माग दाबी हेर्नै बाँकी छ भने एक करोड रूपैयाँ माग दाबी बोर्डले अस्वीकार गरेको थियो । एकातिर समयमा भुक्तानी नगर्ने र अर्कोतिर मागदाबी रकममाथि बोर्डले एक करोड रुपैयाँ अस्वीकार गर्दा अस्पताल समस्यामा परेको छ ।

धेरै रकम बाँकी रहँदा अस्पतालको दैनिकीदेखि आपत्कालीन खर्चमा समस्या परेको गुरुङले जानकारी दिए ।

देशैभरीको स्वास्थ्य बिमा मागदाबीको फाइल पुनः बिमाका कर्मचारीले हेरेर पुष्टि गरेपछि मात्र भुक्तानी गर्ने प्रक्रियाले ढिला भएको स्वास्थ्य बिमा बोर्डका निमित्त कार्यकारी निर्देशक डा. शर्माले बताए ।

बक्यौता रकम तीन महिनाको अन्तरालमा भुक्तानी गर्ने बोर्डको प्रक्रिया छ । डा. शर्माका अनुसार देशभरीको मागदाबीको समयमै भेरीफाइ गर्न नसक्दा समस्या उत्पन्न भएको हो। टिचिङसहित देशभरका अस्पतालमा गरी बोर्डले ११ अर्ब भुक्तानी गर्न बाँकी छ ।

हालसम्म कुल जनसंख्याको २७ प्रतिशत नागरिक स्वास्थ्य बिमा कार्यक्रममा आबद्ध रहेका छन् ।