माडी, ९ पुस
विजय लघुवित्त वित्तीय संस्था लिमिटेड, माडी शाखाले मंसिर ८ गते माडी क्याम्पस, बसन्तपुरको सभाहलमा वित्तीय साक्षरता कार्यक्रम सफलतापूर्वक सम्पन्न गरेको छ ।
कार्यक्रमले स्थानीय समुदायमा वित्तीय अनुशासन, बचत, कर्जा व्यवस्थापन, र जोखिम न्यूनीकरणका महत्त्वपूर्ण पक्षहरूमा जनचेतना अभिवृद्धि गर्ने उद्देश्य राखेको थियो।
कार्यक्रमको सभाध्यक्ष तथा प्रमुख प्रशिक्षक श्री शम्भु प्रसाद रेग्मीले बचत, आम्दानी र खर्चको सन्तुलन, आवश्यकताका प्राथमिकता निर्धारण, कर्जाको सदुपयोग, बिमाको महत्त्व, र जोखिम व्यवस्थापनबारे सहभागीहरूलाई प्रष्ट पार्नुभयो। उहाँले सहभागीहरूलाई कर्जाको सही उपयोगले मात्र आर्थिक स्थिरता हासिल गर्न सकिने र अनियमितताबाट जोगिनुपर्नेमा जोड दिनुभयो।
कार्यक्रममा प्रमुख अतिथिका रूपमा माडी नगरपालिका वडा नं. ३ का वडा अध्यक्ष श्री पुरन महतोले सहभागिता जनाउनु भयो। उहाँले कर्जालाई समयमा फिर्ता गर्ने र आम्दानी वृद्धि हुने क्षेत्रमा लगानी गर्ने महत्त्वका विषयमा प्रकाश पार्दै, “वित्तीय अनुशासनलाई आत्मसात् गरेमा मात्रै आर्थिक जीवन सफल हुन सक्छ” वहाले बताउनुभयो ।
विशिष्ट अतिथिका रूपमा इलाका प्रहरी कार्यालय माडीका प्रहरी निरीक्षक श्री केदारमान दोङले डिजिटल कारोबार र साइबर सुरक्षाका विषयमा महत्त्वपूर्ण जानकारी दिनुभयो। उहाँले डिजिटल कारोबार गर्दा अपनाउनुपर्ने सावधानी, साइबर जोखिमको पहिचान, र सुरक्षित लेनदेनका उपायहरूबारे सहभागीहरूलाई सचेत गराउनुभयो।
कार्यक्रममा सहभागीहरूको तर्फबाट इन्द्रदेवी महतोले मन्तव्य दिनुभयो। उहाँले तालिमले आफूहरूको जीवनमा सकारात्मक प्रभाव पार्ने विश्वास व्यक्त गर्दै यस्ता कार्यक्रमलाई निरन्तरता दिनुपर्नेमा जोड दिनुभयो।
कार्यक्रमको सञ्चालन माडी शाखाकी कर्मचारी तृप्ती महतोले गर्नुभएको थियो। उहाँले कार्यक्रमलाई व्यवस्थापन र सञ्चालनमा प्रभावकारी रूपमा प्रस्तुत गर्न जोडदिनुभएको थियो ।
कार्यक्रममा ७० जना सहभागीहरूले कर्जा व्यवस्थापन, बचत, र जोखिम न्यूनीकरणबारे ज्ञान हासिल गर्न पाएको प्रतिक्रिया दिएका थिए। सहभागीहरूले यस्ता कार्यक्रमहरूले आफ्नो वित्तीय व्यवहारलाई सुधार गर्न प्रेरणा मिलेको बताउनुभयो।
विजय लघुवित्त वित्तीय संस्था लिमिटेडले आगामी दिनमा यस्ता कार्यक्रमलाई अझ व्यवस्थित रूपमा अघि बढाउँदै सदस्यहरूको आर्थिक सक्षमतामा योगदान पुर्याउने प्रतिबद्धता व्यक्त गरेको छ ।
