– हिरालाल आचार्य ‘डायमण्ड’
चितवन, असोज २०
चितवनस्थित कृषि तथा वन विज्ञान विश्वविद्यालय रामपुरको जग्गामा निर्माणाधीन गौतमबुद्ध अन्र्तराष्ट्रिय क्रिकेट रंगशाला लामो समयदेखि अलपत्र हुँदा काँसघारीमा परिणत हुन पुगेको छ ।
३ अर्ब लागत अनुमान गरी जनस्तरबाट सहयोग उठाएर निर्माण गर्ने गरी धुर्मुस सुन्तली फाउण्डेशनले २०७५ सालमा क्रिकेट रंगशाला निर्माणको थालनी गरेको थियो ।
५० करोडभन्दा बढी रकम खर्च भइसकेको, १८ करोड ऋण रहेको र थप सहयोग जुट्न नसकेको भन्दै धुर्मुस सुन्तली फाउण्डेशनले भरतपुर महानगरपालिकालाई रंगशालाको जिम्मेवारी सुम्पेर २०७८ पुषमा कामबाट हात झिक्यो । त्यस यता रंगशाला निर्माणको काम अघि बढ्न सकेको छैन ।
रंगशालामा संरचनाहरु ध्वस्त हुँदै गएका छन् । रडहरु खिइँदै गएका छन् । रंगशाला काँसघारीमा परिणत भएको छ । खेलाडी दौडनुपर्ने मैदानमा स्याल दौडिरहेका छन् ।
कलाकार सिताराम कट्टेल धुर्मुस रंगशाला निर्माणको अभियानलाई निरन्तरता दिन आग्रह गर्दै भरतपुर महानगरपालिकादेखि सिंहदरबारसम्म धाइरहेका छन् । जनस्तरबाट पनि उक्त रंगशाला अब सरकारले नै बनाउनुपर्ने आवाज उठिरहेको छ ।
स्थानीयहरुले पनि रंगशालामा स्याल दौडन थालेको प्रतिक्रिया दिएका छन् । उनीहरुले रंगशालालाई निर्माण गर्ने भै छिटो गरिहाल्नु पर्ने हैन भने स्थानीयलाई खेलकुद गर्न छोडिदिनुपर्ने धारणा राखे । करोडौंका सामान खिएर नष्ट भइरहेको देख्दा आफूहरुलाई निकै पीडा हुने गरेको स्थानीय बताउँछन् ।
रंगशालाको निर्माणको परियोजनामा २०७५ माघ १६ गते काठमाडौंको प्रज्ञा प्रतिष्ठानमा हस्ताक्षर भएको थियो । उक्त कार्यक्रममा तत्कालिन प्रधानमन्त्री केपी शर्मा ओली, वर्तमान प्रधानमन्त्री पुष्पकमल दाहाल ‘प्रचण्ड’, नेपाली काँग्रेसका तत्कालिन महामन्त्री सशांक कोइराला, तत्काली खेलकुद मन्त्री जगतबहादुर सुनुवार लगायत विशिष्ट व्यक्तिहरुको उपस्थिति रहेको थियो । उनीहरुकै उपस्थितिमा भरतपुर महानगरपालिकासँग धुर्मुस सुन्तली फाउण्डेशनले रंगशाला निर्माण गर्ने सम्झौता पत्रमा हस्ताक्षर गरेको थियो । त्यसपछि रंगशालाको निर्माण कार्य सुरु गरिएको थियो ।
धुर्मुस सुन्तली फाउण्डेशनले रंगशाला निर्माणका लागि सहयोग जुटाउन मेचि महाकाली अभियान गर्नुका साथै विदेशमा समेत विभिन्न कार्यक्रम ग¥यो । सिटमा नाम लेख्ने अभियान चलायो । महायज्ञ लगायो । रंगशालाको नमुना खेलमैदान तयार भएपछि कलाकार भर्सेस क्रिकेट खेलाडीको प्रतिस्पर्धा समेत गराइयो । धुर्मुस सुन्तलीको यो प्रयास रंगशाला निर्माणका लागि खर्च उठाउन पर्याप्त भएन । अन्ततः धुर्मुस सुन्तलीले रंगशाला निर्माणको कामबाट हात झिके ।
२०७८ पौष २ गते उनीहरुले भरतपुर महानगरपालिकालाई स्वामित्व हस्तान्तरणका लागि अनुरोध पत्र पठाएको थियो । त्यसपछि अहिले भरतपुर महानगरपालिको १ जना कुरुवा राखेर रंगशाला कुर्नुबाहेक अरु थप केही काम अघि बढाउन सकेको छैन । महानगरपालिका प्रमुख रेनु दाहालले रंगशाला हामै्र पालामा बनाउँछौं भन्दै पटकपटक आश्वासन भने दिन छाडेकी छैनन् ।
कामबाट हात झिेकेपछि धुर्मुस सुन्तलीमाथि रंगशालाको उधारो र ऋणमाथि निरन्तर प्रश्न उठिरह्यो । एक वर्षसम्म चुप बसेका धुर्मुस गत चैतमा रंगशाला पुगेर ३० मिनेटको भिडियो बनाइ आफ्नो सामाजिक संजालमा हाले ।
रंगशाला निर्माणका लागि सहयोग गर्छु भनि महायज्ञमा कबुल गरेकाहरुले समेत रकम नदिँदा आफूहरु संकटमा परेको उनको भनाइ थियो । महायज्ञबाट ६९ करोडको आश्वास पाए पनि रकम भने जम्मा ९ करोड रुपैयाँमात्र उठेको उनले बताए ।
धुर्मुसले बोलकबोल गरेको रकम उठला र तिरौंला भनि उधारो समान ल्याएर काम गरेको बताउँदै उनले पैसा नउठ्दा तिर्न नसकिएको प्रतिक्रिया दिए । सरकार, विभन्न संघ संस्था, व्यक्तिहरु सबैले म दिन्छु तिमी काम अगाडि बढाउ भन्दै हौशला प्रदान गरेकाले आफूले उधारोमा समान ल्याउनुका साथै ऋण खोजेका उनको भनाइ थियो । यो धुर्मुसको मात्र रंगशाला हो भनि गलत भाष्य निर्माण गरी सरकारले नै असहयोग गर्दा यो अवस्था आएको उनको निष्कर्ष थियो ।
