कञ्चनपुर साउन ८,
कञ्चनपुरमा पछिल्लो समय राहदानी बनाउनेको संख्यामा वृद्धि हुँदै गएको छ ।
जिल्ला प्रशासन कार्यालय कञ्चनपुरले पनि राहदानी वितरणलाई सहज बनाउन कार्यालय समयसँगै अतिरिक्त समय पनि सेवा दिँदै आएको छ ।
जिल्लाबाट गत वर्ष १० हजार १९४ जनाले राहदानी लिएको प्रशासन कार्यालयको राहदानी फाँटका कम्प्युटर अपरेटर कमल बोहराले जानकारी दिए ।
‘२ हजार ९१४ महिला र ७ हजार २८० पुरुषले राहदानी लिएका छन्,’ उनले भने, ‘पछिल्लो समय प्रवीणता प्रमाणपत्र तह पास गरेर विदेश जाने युवायुवती राहदानी बनाउन आउने क्रम बढेको छ ।’
पछिल्लो समय खाडीलगायत तेस्रो मुलुक जाने संख्या वृद्धि भएसँगै राहदानी बढाउनेको संख्या वृद्धि भएको छ । जिल्ला प्रशासन कार्यालयका अनुसार गत आर्थिक वर्ष २०७९/०८० मा १२ हजार ३३६ महिला तथा पुरुषले नागरिकता लिएका छन् ।
अपरेटर बोहराले यहाँ वंशजका आधारमा १२ हजार ३१५ जना र वैवाहिक अंगिकृतका आधारमा २१ जना महिलाले नयाँ नागरिक प्राप्त गरेको जानकारी दिए । प्रशासनबाट ९ हजार ७६ जनाले नागरिकको प्रतिलिपि लिएको देखिएको छ । उनले नयाँ नागरिकतासँगै राष्ट्रिय परिचयपत्र बनाउनुका साथै राहदानी समेत सँगै बनाउने क्रम बढेको बताए ।
गत वर्ष १७ हजार ३२४ जनाले राष्ट्रिय परिचयपत्र बनाएका छन् भने अघिल्लो आवका ४ हजार २८१ राष्ट्रिय परिचयपत्र समेत वितरण गरिएको प्रशासनले जनाएको छ ।
