काठमाडौं – मुलुकमा शान्ति सुरक्षा कायम गर्न नसकेको र अयोग्य लडाकुलाई अनावश्यक रकम दिन लागिएको भन्दै नेकपा (एमाले)निकट राष्ट्रिय युवा संघका नेता–कार्यकर्ताले प्रधानमन्त्रीको पुतला दहन गरेका छन् ।
(शनिबार) काठमाडौंको नयाँ बानेश्वरमा विरोध प्रदर्शन गर्दै उनीहरूले प्रधानमन्त्री पुष्पकमल दाहाल ‘प्रचण्ड’को पुतला दहन गरेका हुन् । अयोग्य लडाकुलाई दुई लाख रुपैयाँका दरले राहत दिने गरी ल्याइएको कार्यविधि तत्काल खारेज गर्न उनीहरूले दबाब दिए ।
अयोग्य लडाकुका नाममा राजनीतिक अभिष्ट पूरा गर्ने गरी ल्याइएको कार्यविधि तत्काल खारेज नगरे आन्दोलनको आँधीबेहरी सिर्जना गरी सरकारलाई घुँडा टेकाउन बाध्य हुने युवा संघका अध्यक्ष क्षितिज थेबेले चेतावनी दिए ।
उनीहरूले वर्तमान सरकारले नीतिगत भ्रष्टाचार सुरु गरेको आरोप पनि लगाए ।प्रदर्शनमा सहभागीले ‘शान्ति सुरक्षा कायम गर’, ‘भ्रष्टाचार अन्त्य गर’ लगायत नारा लेखिएका प्लेकार्ड बोकेका थिए । बानेश्वरको निषेधित क्षेत्रबाट अघि बढ्न खोजेपछि प्रहरीले उनीहरूलाई रोकेको थियो ।
