काठमाडौं – सभामुख देवराज घिमिरेसँग नेपालका लागि क्युबाका राजदूत एलेजान्ड्रो सिमानकास मारिनले सिंहदरबारमा बुधबार शिष्टाचार भेट गर्नुभएको छ । भेटमा संसदीय आदान प्रदान, दुई देशबीचको सम्बन्ध विस्तार लगायतका विषयमा छलफल भएको छ ।
सभामुख घिमिरेले नेपाल र क्युवाबीच कूटनीतिक सम्बन्ध स्थापना भएको ४८ वर्ष पुगेको स्मरण गर्दै दुई देशबीच आर्थिक, सामाजिक र राजनीतिक क्षेत्रमा सहयोग पुगेको विश्वास व्यक्त गर्नुभएको छ । उहाँले महाभूकम्पमा क्युबाको चिकित्सक टोलीले पु¥याएको सहयोगको प्रशंसा गर्नुभएको थियो ।
भेटमा सभामुख घिमिरेले क्युबाको संसद्को हालै भएको निर्वाचनमा निर्वाचित अध्यक्ष र सांसदहरूलाई शुभकामना दिनुभएको थियो । उहाँले दुई देशका संसदबीच मैत्रीपूर्ण सम्बन्ध विस्तार र संसदीय आदान प्रदान गर्न नेपाल तयार रहेको समेत बताउनुभयो ।
राजदूत एलेजान्ड्रोले क्युबाको संसदमा पहिलोपटक क्युबा–नेपाल मैत्री समूह गठनको तयारी भएको जानकारी दिँदै नेपालले पनि मैत्री समूह गठन गर्ने विश्वास व्यक्त गर्नुभयो । उहाँले अमेरिकाले दुई वर्षअघि क्युबामाथि लगाएको आर्थिक नाकाबन्दीविरुद्ध नेपाल उभिएको स्मरण गर्दै नेपालको समर्थनप्रति धन्यवाद व्यक्त गर्नुभयो ।
