माडी, ५ कात्तिक –
बाम लाेकतान्त्रिक गठबन्धनलाई विजयी गराउन बुद्धिजीवी र पेशाकर्मी अगुवाहरू सक्रिय भएका छन् । यसै सन्दर्भमा माडीका
बुद्धिजीवी एवं पेशाकर्मीहरूले संयुुक्त भेला आयाेजना गरेका छन् । उनीहरूले समाजमा स्थापित उमेदवार मैदानमा आएकोले विजय निश्चित रहेको बताएका छन् ।यसैक्रममा माओवादी केन्द्रका नेता सुर्य सुवेदी पथिकले भेलालाई नागरिक आन्दोलनकाे संज्ञा दिए । साे भेलालाई सम्बाेधन गर्दै जनताको माग र आवश्यकता पूरा गर्न गठबन्धन अघि बढेको बताए ।
संविधानसभा सदस्य रामकृष्ण घिमिरेले लाेकतन्त्र संरक्षणकाे जिम्मेवारी बुद्धिजीवीको हातमा रहेको बताए । देशका विभिन्न ठाउँमा गठबन्धन भएको उल्लेख गर्दै उनलेे असन्तुष्टि सार्वजनिक गर्नु अहिले ठिक नभएको बताए । उनलेे सबैले त्याग गरेको र त्यसको ईतिहासले मूल्यांकन गर्ने पनि बताए ।
उम्मेदवारकाे मूल्यांकन गरेर मत दिने सुझाव दिन बुद्धिजीवी र पेशाकर्मीहरूलाई वरिष्ठ चिकित्सक डा. भाेजराज अधिकारीले आग्रह गरेका छन् । भेलालाई सम्बाेधन गर्दै प्रतिनिधिसभा चितवन क्षेत्र नम्बर ३ अन्तर्गत बाम लाेकतान्त्रिक गठबन्धनका उमेदवार डा. अधिकारीले विकास र परिवर्तनको मुद्दा अघि बढाउने याेजना आफूसँग मात्रै रहेको बताएका छन् । आफूले दीर्घकालीन विकास रणनीति अघि बढाउनले बचनबद्वता व्यक्त गरेका छन् । मंसिर ४ गतेसम्म आफूसँग केही नहुने बताएका उनलेे बुद्धिजीवी एवं पेशाकर्मीहरूकाे याेजना अनुसार काम गर्ने विचार राखे ।
नेपाली कांग्रेस चितवनका सभापति राजेश्वर खनालले राष्ट्रिय परिस्थितिले गठबन्धन निर्माण भएको बताए । संसद विघटन र प्रतिगमनका विरूद्व एकताबद्ध हुन उनको आग्रह छ ।
उनलेे त्यसकारण आन्तरिक असन्तुष्टि र द्वन्द्व अन्त्य गरि गठबन्धनलाई बलियो बनाउनुपर्नेमा जाेड दिए । विदेशीनुका समस्याको समाधान निकाल्न एनआरएनए अमेरिकाका अध्यक्ष बुद्विसागर सुवेदीले सुझाव दिए ।
प्रतिगमनकाे संस्थागत गर्नेलाई पाठ सिकाउनुपर्ने समय आएकाे विनाेद तिमिल्सिनाले बताएका छन् । बाम लाेकतान्त्रिक गठबन्धनबाट मात्रै राजनीतिक काेर्ष अघि बढ्न सक्ने उनको भनाइ छ ।
निर्वाचन क्षेत्र नम्बर ३ मा विशिष्टिकृत अस्पताल बनाउने याेजना बनाउन वरिष्ठ क्यान्सर राेग विशेषज्ञ डा.विजयचन्द्र आचार्यले सुझाव दिए । शिक्षा र स्वास्थ्यलाई प्राथमिकतामा राख्न सके माडी मणिकाे रूपमा परिवर्तन हुनसक्ने उनलेे बताए । गठबन्धन अन्तर्गत माओवादी केन्द्रका उम्मेदवार ठाकुरप्रसाद ढकालले राष्ट्रिय निकुञ्जको ऐनमा देखिएकाे समस्या सम्बाेधन गर्न संघर्ष गर्ने बताएका छन् । जनताकाे समस्यामा एकताबद्ध हुन उनको अपिल छ । रिउ करिडोर बनाउन प्रयत्न गर्ने उम्मेदवार ढकालको प्रतिबद्धता छ ।
