काठमाडौं,वैशाख ३ ।
अध्यागमन विभागले भिजिट भिसामा विदेश जाने नेपाली नागरिकको राहदानीमा प्रस्थान छापसँगै गैरकानुनी गतिविधि गर्ने कर्मचारीमाथि कारबाही गर्न छानबिन प्रकिया अघि बढाएको छ ।
भिजिट भिसामा विदेश जान लागेको एक नेपालीको राहदानीमा अध्यागमनको कर्मचारीले प्रस्थान छापसँगै ‘काम गर्न पूर्ण रूपमा अनुमति छैन भन्दै उल्लेख गरेको पाएपछि छानबिन प्रकिया अघि बढाएको हो ।
विभागले आज एक प्रेस विज्ञप्ति जारी गर्दै कुनै पनि नागरिकलाई प्रचलित कानुनभन्दा बाहिर गई अतिरिक्त शर्त तोकेर प्रस्थान अनुमति दिने नीति नभएको स्पष्ट पारेको छ। यस्ता गतिविधि गैरकानुनी भएको उल्लेख गर्दै संलग्न कर्मचारीमाथि कारबाहीका लागि आन्तरिक छानबिन प्रक्रिया अघि बढाइएको जनाएको छ।
विज्ञप्तिमा भनिएको छ,‘कुनै पनि नेपाली नागरिकलाई कानुनभन्दा बाहिर गई शर्त तोकेर प्रस्थान अनुमति दिने अध्यागमन प्रशासनको कुनै नीति वा निर्णय नभएको हुँदा प्रचलित कानुन र विभागीय निर्णय बाहिर गई गैरकानूनी अभ्यास गर्ने कर्मचारीलाई कारवाहीको लागि आन्तरिक छानवीनको प्रक्रिया अगाडि बढाईएको छ । ’
अनावश्यक कागजात माग गर्ने र तजबिजीको आधारमा निर्णय गरी हुने गरेको अनियमिततालाई नियन्त्रण गर्न सरकारले २०८२ कार्तिक १३ को निर्णयअनुसार भिजिट भिसामा विदेश जाने नागरिकका लागि कम्तीमा ६ महिना वैध राहदानी, गन्तव्य देशसम्मको हवाई टिकट र सम्बन्धित देशको भिसा भएमा स्वघोषणासहित प्रस्थान अनुमति दिने व्यवस्था लागू गरेको थियो ।
विभागले यात्रुहरूको आगमन र प्रस्थानलाई झन्झटरहित बनाउन नीतिगत सहजीकरण र अध्यागमन प्रणालीलाई थप आधुनिकीकरण गरी राष्ट्रिय सुरक्षाको सुदृढीकरणका क्षेत्रमा समेत काम गरिरहेको प्रवक्ता टीकाराम ढकालले जानकारी दिए ।
