भरतपुर, ७ पुसः
नारायणी किनारमा सम्पन्न खेलकुद तथा व्यापार महोत्सवको फोहोर राति जलाइएको घटनामा कारबाही गर्न भन्दै जेन्जी समूह चितवन र बेटर चितवनले भरतपुर महानगरलाई ४८ घण्टे अल्टिमेटम दिएको छ । फोहोर जलाइएको २८ दिन बितिसक्दा पनि महानगरले दोषीमाथि कुनै ठोस कारबाही नगरेकाले फेरि चेतावनी पत्र बुझाउन बाध्य भएको जेन्जी समूह चितवनका आशिष सापकोटा बताउँछन्।
सापकोटाका अनुसार ४८ घण्टे अल्टिमेटम पत्रमा मुख्यत पाँचवटा मागहरू रहेका छन्। महोत्सव आयोजक सम्बन्धित ठेकदार तथा जिम्मेवार पदाधिकारीमाथि फोहोर मैला व्यवस्थापन ऐन ,वातावरण संरक्षण ऐन, स्थानीय सरकार सञ्चालन ऐन तथा सर्वोच्च अदालतका आदेश अनुसार तत्काल कारबाही गर्ने चेतावनी पत्रमा भनिएको छ।यस्तै फोहोर जलाउने कार्यमा संलग्न व्यक्ति तथा संस्थामाथि दण्ड जरिवाना तथा क्षतिपूर्ति असुलीको निर्णय कार्यान्वयन गर्ने समेत पत्रमा उल्लेख छ ।यसैगरी उक्त घटनाबाट नारायणी आसपासको क्षेत्रमा भएको वातावरणीय क्षतिको मूल्याङ्कन गरी सरसफाई तथा पुनःस्थापना कार्य आयोजकबाटै गराउने मागपत्रमा उल्लेख छ।
बेटर चितवन र जेनजि समुह चितवनले संयुक्त रुपमा आज महानगरको प्रमुख प्रशासकीय अधिकृत लक्ष्मी पौडेललाई पत्र बुझाएको बेटर चितवनका संस्थापक सागर कार्कीले बताए।उनका अनुसार अन्य मागहरुमा भविष्यमा यस्ता महोत्सव वा ठूला कार्यक्रमका लागि अनिवार्य फोहोर तथा वातावरण व्यवस्थापन योजना पूर्ण कार्यान्वयन नगरेसम्म अनुमति नदिने प्रशासनिक व्यवस्था कडाईका साथ लागू गर्न माग गरिएको छ ।यसैगरी नदी किनार क्षेत्रमा फोहोर फाल्ने वा जलाउने कार्यमा संलग्न जोसुकैलाई शून्य सहनशीलताको नीति अवलम्बन गरी कारबाही गर्ने स्पष्ट निर्देशन जारी गर्न समेत माग गरिएको कार्कीले जानकारी दिए।
चेतावनी मागपत्र सम्बोधन नभए उपल्लो निकाय मुद्दा लिएर जाने उक्त समूहले जनाएको छ । यसभन्दा अगाडिसमेत दोषीलाई कारबाहीको माग गर्दै गत मङ्सिर ८ गते तिनै समूहले महानगरलाई पत्र काटेका थिए। त्यतिबेला पत्र लिएर बारम्बार महानगर धाइरहेको यो समूह लाई प्रमुख प्रशासकीय अधिकृत पौडेलले घटनाको छानबिन गरी दोषी उपर कारबाही गर्ने प्रतिबद्धता दिएका थिए। आज ठ्याक्कै २८ दिनपछि फेरि उनले पुस ९ गते ५ बजेभित्र दोषीलाई कारबाहीको दायरामा ल्याउने प्रतिबद्धता दोहोराएका छन् ।”हामी यस बारेमा बुझेर कारबाही प्रक्रियामा लागेका छौं । पूर्वाग्रह राखेर कारबाही गर्यो भन्ने नपरोस् भनेर केही समय हामीले लिएका हौं। पौडेलले भने । पुष ८ गते नगरसभा सक्ने बित्तिकै यस विषयमा एक्सन लिने उनले फेरि दोहोर्याए ।
२८ दिनसम्म कारबाही नगरेको महानगरले अबको केही दिनमा कारबाही गर्छ भन्नेमा विश्वास छ भन्ने प्रश्नमा कारबाही नभए पर्यावरण अपराधको ठहर गरी महानगरकै अगाडि धर्ना बस्न लागेको समूहले जानकारी दिएको हो ।”प्रशासनप्रमुखको केही दिनमा सरुवा हुने भन्ने कुरो सुनेको छु। उहाँले कारबाही गर्छु भनेरै दिन र समय तोकेपछि भरोसा नै गर्न नसके पनि आशा गर्नुको विकल्प छैन। कारबाही नगरे हामी सिर्जनात्मक शैलीमा विरोधका कार्यक्रम गर्छौं।परिआए उपल्लो निकाय पुगेरै भएपनि दोषीलाई कारबाही गरेरै छाड्छौं” । समूहका एक सदस्यले चितवनअपडेट सँग भने।
छलफलको क्रममा प्रमुख प्रशासकीय अधिकृत पौडेलले आफू निकट व्यक्ति र समुहलाई सिफारिसका आधारमा मात्रै अनुमति दिने गरेको हुँदा यो समस्या आएकाले अब नगरसभाबाट नै यस्तो किसिमको मेला महोत्सव गर्न नारायणी किनारको साटो वैकल्पिक स्थानमा मात्रै अनुमति दिने नीति ल्याउन अग्रसर रहेको जानकारी दिए।
चितवन जिल्ला खेलकुद विकास समितिको आयोजनामा गत कार्तिक १८ देखि मंसिर २ सम्म नारायणी किनारमा गरिएको महोत्सव सकिए लगत्तै राति फोहोर जलाइएको थियो।
महानगरको फोहोर उठाउने ठेक्का पाएको संस्थाका केशव नेपालले यस विषयमा आयोजकले आफूहरूसँग कुनै पूर्व सम्झौता नगरेको बताएका छन्। पहिले ४ लाख रुपैयाँमा महोत्सवको फोहोर उठाउने आफूहरुले प्रस्ताव गरेपनि आयोजक सहमत नभएपछि २.५ घनमिटर फोहोर सहितको एक ट्रिपको ३००० पर्ने भन्दै आफूहरुले बताएको तर आयोजक सँग फोहोर उठाउने कुनै सहमति नभएको उनले प्रस्ट पारे ।
यस विषयमा आयोजक चितवन खेलकुद विकास समितिले भने घटनाको जानकारी सञ्चारमाध्यममा समाचार आएपछि मात्रै थाहा पाएको भन्दै फोहोर जलाउनमा आफूहरुको संलग्नता नरहेको भन्दै प्रेस विज्ञप्ति सार्वजनिक गरेको थियो।
