काठमाडौं,मंसिर ६-
नेपाल प्रिमियर लिग (एनपीएल) क्रिकेटमा कर्णाली याक्सले लुम्बिनी लायन्समाथि सहज जित निकालेको छ । त्रिवि क्रिकेट मैदानमा शनिबार भएको खेलमा मार्क वाटको शतकको मद्दतमा कर्णालीले लुम्बिनी लायन्सलाई ९ विकेटले हराएको हो ।
लुम्बिनीले दिएको १५७ रनको लक्ष्य कर्णालीले १२ ओभर २ बलमा एक विकेटको क्षतिमा पूरा गर्यो । कर्णालीका लागि वाटले ११४ रनको शतकीय पारी खेले । उनले ४४ बलमा ६ चौका र १२ छक्का प्रहार गरे । २९ बलमा अर्धतक पूरा गरेका उनले थप ४१ बलमा शतक पूरा गरेका थिए । कर्णालीका ओपनर प्रियांक पञ्चाल १२ रनमा आउट भए भने विलियम वोसिस्टो २९ रनमा अविजित रहे । लुम्बिनीका लागि एक मात्रै विकेट शेर मल्लले लिए ।
यसअघि टस हारेर पहिले ब्याटिङको निम्तो पाएको लुम्बिनीले निर्धारित २० ओभरमा आठ विकेट गुमाएर एक सय ५६ रन बनाएको थियो । लुम्बिनीले टोलीको कुल स्कोर ५० रन पुग्नुअघि नै तीन प्रभावशाली विकेट गुमाइसकेको थियो । लुम्बिनीका लागि कप्तान रोहित पौडेलले सर्वाधिक ४९ रन जोडे । यस्तै, रुबेन ट्रम्पलमान २९ रनमा अविजित रहे । जोहानीस जोनाथन स्मितले २३ रन तथा डी’आर्की शर्टले १९ रन बनाउँदा अन्य ब्याट्सम्यानले दोहोरो अङ्कमा रन बनाउन सकेनन् । बलिङतर्फ कर्णालीका नन्दन यादवले दुई विकेट लिए भने सोमपाल कामी, गुलशन झा, मार्क वाट, विपिन शर्मा र युवराज खत्रीले एकरएक विकेट लिए ।
आजको दोस्रो खेल काठमाण्डू गोर्खाज र विराटनगर किङ्सबीच हुँदैछ ।
