– हिरालाल आचार्य ‘डायमण्ड’
चितवन, माघ ४ –
चितवन महोत्सव परिसरमा सेपाक ताक्रो खेल प्रतियोगिता सम्पन्न भएको छ । चितवन महोत्सव मुल समितिले सेपाक ताक्रो संघ चितवनसँगको सहकार्यमा उक्त प्रतियोगिता सम्पन्न गरेको हो ।
महिला र पुरुष दुबैको प्रतियोगिता गरिएको थियो । पुरुषतर्फ बालप्रेमी काठमाडौं पहिलो, सेपाक ताक्रो संघ नवलपुर दोश्रो र रामनगर मावि चितवन तेश्रो बनेको महोत्सव खेलकुद समिति संयोजक शंकर प्रसाद घिमिरेले जानकारी दिए ।
महिलातर्फ सेपाक ताक्रो संघ चितवन पहिलो, रामनगर मावि चितवन दोश्रो र सेपाक ताक्रो संघ नवलपुर तेश्रो हुन सफल भए । प्रथम, द्दित्तय र तृतिय हुन सफल सबै टिमले ट्रफि, मेडल र प्रमाण पत्र प्राप्त गरेका छन् ।
पुरुषतर्फ १० र महिलातर्फ ६ टिम सहभागी रहेका थिए । ब्याड मिन्टनको जस्तै खेल मैदानमा खेलिने सेपाक ताक्रोमा हातबाहेक खुट्टा, टाउको र शरिरले बललाई हानेर खेलिन्छ । १२ वर्ष अघि सिङ्गापुरबाट फर्किएका भूपू सैनिकहरुले उक्त खेल नेपालमा भित्र्याएको सेपाक ताक्रो संघ चितवनका उपाध्यक्ष रामबहादुर भण्डारीले जानकारी दिए ।
नारायणगढस्थित नारायणी नदी किनारको प्रदर्शनी मैदानमा उद्योग वाणिज्य संघ (उवासंघ) चितवनद्वारा आयोजित १५ औं संस्करणको चितवन महोत्सव उल्लासमय तरिकाले चलिरहेको छ ।
महोत्सवमा विविधि विविधि गतिबिधिहरु भइरहेका छन् । जसमा दैनिक सांस्कृतिक कार्यक्रम भइरहेको छ भने कहिले काहिँ खेलकुदका गतिविधि समेत भइरहेका छन् ।
पुष २५ गते बाट सुरु भएको चितवन महोत्सव माघ १० गतेसम्म चल्ने छ । महोत्सव बिहान १० बजेबाट बेलुका ६ बजेसम्म सञ्चालन भइरहेको छ । महोत्सवको टिकट शुल्क सर्वसाधारणका लागि १०० र विद्यार्थीका लागि ५० रुपैयाँ तोकिएको छ ।
चितवन महोत्सव अन्तर्गत नै पुष २९ गतेबाट नारायणगढको क्याम्पाचौरमा फुड फेस्टिबल समेत सुरु भएको छ । फुड फेस्टिबल माघ ७ गतेसम्म चल्ने छ भने बिहान ८ बजेबाट राति १० बजेसम्म सञ्चालन हुने छ ।
