मुम्बई, पुस १५ –
सलमान खानको बहुप्रतिक्षित फिल्म सिकन्दरको टिजर सार्वजनिक भएको छ । सलमानले आफ्नो जन्मदिनको भोलिपल्ट यस फिल्मको टिजर रिलिज गरेका हुन् ।
फिल्ममा सलमानको दमदार एक्सन हुनेछ, यो टिजरको पहिलो झलकमा नै स्पष्ट हुन्छ । यो टिजरमा मिश्रित प्रतिक्रिया आइरहेका छन् तर सिकन्दरको टिजरले युट्युबमा आएलगत्तै हलचल मच्चाएको छ । यो टिजर ट्रेन्डिङमा पहिलो नम्बरमा पुगेको थियो ।
सलमान खानको फिल्म सिकन्दरको टिजरलाई २४ घण्टामै युट्युबमा ४२ मिलियनभन्दा बढी भ्युज प्राप्त भएको छ । एक दिनपछि यो टिजर ५ करोडभन्दा बढी पटक हेरिएको छ र यो संख्या लगातार बढिरहेको छ ।
सिकन्दरको टिजरले अल्लु अर्जुनको फिल्म पुष्प २ को टिजरको रेकर्ड तोडेको छ । पुष्पा २ को टिजरलाई २४ घण्टामा ३९.३ मिलियन भ्युज प्राप्त भएको थियो । सालार पार्ट: १ को टिजर यस सूचीमा पहिलो नम्बरमा छ। चलचित्रको टिजरलाई २४ घण्टाभित्र ८३ मिलियन भ्युज प्राप्त भएको थियो ।
सिकन्दरको टिजर पाँचौँ नम्बरमा आएको छ । योसँगै शाहरुख खानको डन्की छैटौँ स्थानमा छ । यो फिल्मको टिजरले २४ घण्टामा ३६.८ मिलियन भ्युज पाएको छ ।
सिकन्दरलाई एआर मुरुगादासले निर्देशन गर्दैछन् । फिल्ममा सलमान खानसँग रश्मिका मन्दाना देखिने छिन् भने काजल अग्रवालको पनि महत्त्वपूर्ण भूमिका छ ।
टिजरमा यी दुई सुन्दरीको झलक देखाइएको छैन । यस्तो अवस्थामा फ्यानहरू अब ट्रेलरको प्रतीक्षामा छन् । सलमान खानको यो फिल्म सन् २०२५ को ईदको अवसरमा थिएटरमा रिलिज हुनेछ ।
