सडकमा पानी आएको समस्या समाधान भएको छैन । दशैं अघि खोल्सो खन्नु बाहेक अरु त्यहाँ केही काम थालिएको पनि छैन । अहिल पानी रसाएको ठाउँलाई घेरेर सडकको अरु भाग खुला गरिएको छ । दशैंका बेला पनि यसो गर्न सकिन्थ्यो । तर किन गरिएन ? त्यतिबेला चितवन आजले पनि यही प्रश्न उठाएको थियो । नारायणगढका व्यावसायीसहित स्थानीयहरुले पनि प्रश्न गरेका थिए ।

दशैंका बेला पार्किङ स्थल बनाउन नै १ किमी सडक रोकिएको हो भन्ने कुरा पुष्टि हुँदै गएको छ । अहिले दशैं सकिएपछि सिजी मल र भाटभटेनीलाई बाहिर पार्किङ नचाहिने भएपछि सडक पुनः खुला गरिएको विषय उठ्न थालेको छ ।

सडक डिभिजन कार्यालय भरतपुर चितवनका सूचना अधिकारी चन्डेश्वर शाहले सडकमा पानी रसाउने समस्या देखिएको बताए । उनले खानेपानीको पानी होकी अरु केही हो भन्ने एकिन नभइसकेको जानकारी दिए । उनले त्यसलाई नै आधार बनाएर १ किमी सडक किन रोकिएको भन्ने प्रश्नमा सडक डिभिजन यस विषयमा जानकार नरहेको भन्दै उम्किन खाजे । उनले निर्माण कम्पनीलाई उक्त कुरा सोध्न सुझाए ।

भरतपुरको पुल्चोकदेखि गोन्द्राङसम्मको सडक सिक्स लेनमा विस्तार भएको छ । केही कामहरु बाँकी छन् । सडक अझै पनि निर्माण कम्पनीकै अधिनमा छ । निर्माण कम्पनी सगुन जेभीका इन्जिनियर सहदेव खड्काले त्यहाँ पानी रसाएको र उक्त रसाएको ठाउँमा अध्ययन गर्न छेकबार गरिएको बताए । अहिले रसाएको ठाउँमा मात्र छेकिएको छ दशैंका बेला चाहिँ १ किमी सडक छेक्ने यो चाहिँ किन भन्ने प्रश्नमा उनले स्पष्ट जवाफ दिन सकेनन् । उनले सवारी साधन पार्किङ गर्नका लागि रोकिदिनुभएको हो भन्ने प्रश्नमा आफूहरुले कसैलाई पनि नचिनेको र कसैलाई सवारी पार्किङ गराउने कुरा नभएको बताए ।

दुबै जिम्मेवार निकायहरुले स्पष्ट जवाफ दिन नसक्नु, अहिले पानी रसाएकै ठाउँमा मात्र छेकबार लगाएर अरु सडक खुला राख्न मिल्नु, दशैंका बेला भने १ किमी सडक छेक्नु, अनि त्यसमा सिजी मल र भाटभटेनीका सवारी साधन पार्किङ गरिनु, त्यस विषयमा सडक डिभिजन, भरतपुर महानगर, ट्राफिक कार्यालय लगायतका सम्बन्धित निकाय मौन बस्नु जस्ता कुराले उक्त सडकको दुरुपयोग भएको कुरालाई लुकाउन सक्दैन । सिक्स लेनमा बिस्तार गरिएको राममार्गलाई व्यावसायिहरुले आफ्नो स्वार्थका लागि सडक नै अवरुद्ध गरी सम्बन्धित निकायलाई प्रभावित पारेर पार्किङ स्थल बनाएको कुरालाई पछिल्ला गतिविधिले पुष्टि गरिदिएको छ ।