– हिरालाल आचार्य ‘डायमण्ड’
चितवन, मंसिर २६ –
कृषि तथा वन विज्ञान विश्वविद्यालय रामपुर चितवनमा कृषि संकाय अन्तर्गतको पाँचौ सेमेष्टरको मोलिकुलर एण्ड पपुलेशन जेनेटिक्स विषयको मौका परीक्षा दिएका विद्यार्थीहरुले रिले अनशन सुरु गरेका छन् । विश्वविद्यालयको परीक्षा नियन्त्रक कार्यालयको मुल गेट अगाडि विद्यार्थीहरुले हिजोबाट अनसन सुरु गरेका हुन् ।
विश्वविद्यालयले नियतवश विद्यार्थीहरुलाई फेल गराएको आरोप लगाउँदै विद्यार्थीहरुले संघर्ष समिति नै बनाएर रिले अनशन सुरु गरेका हुन् । विद्यार्थीहरुले आफूले परीक्षा दिएको उत्तरपुस्तिका हेर्न पाउनु पर्ने माग राखेका छन् ।
विद्यार्थीहरुले उपलब्ध गराएको तथ्यांकअनुसार केन्द्रबाट नियमित परीक्षा दिएका १८३ जनामा ९६ जना फेल भए । मौका परीक्षा दिएका ९६ जनामा ४७ जना फेल भएका छन् । अहिले विद्यार्थीहरुले आठौं सेमेष्टरको परीक्षा दिइसकेका छन् ।
तर पाँचौ समेष्टरको परीक्षामा झुल्नु परेको भन्दै विद्यार्थीहरु आक्रोशित बनेका हुन् । मौका परीक्षा पनि लामो समयपछि गर्ने अनि त्यसमा नियतवश विद्यार्थीहरुलाई इगो राखेर फेल गराइएको उनीहरुको आरोप छ ।
अरु सबैमा सेमेष्टर र विषयमा राम्रो नम्बर ल्याएर रेगुलर पास भएका समेत यही एउटा विषयमा फेल भइरहेको विद्यार्थीहरुले जनाएका छन् ।
सर्वाेच्च अदालतले त्रिभुवन विश्वविद्यालय अन्तर्गतका काठमडौंमा रहेका दुई क्याम्पसका विद्यार्थीहरुको मुद्दामा केही वर्ष अघि सुनुवाई गर्दै उत्तरपुस्तिका हेर्न दिन आदेश दिएको थियो । कृषि विश्वविद्यालयले त्यही नजिरलाई सम्झेर उत्तरपुस्तिका देखाउनुपर्ने विद्यार्थीहरुको माग छ । अन्यथा आफूहरु सर्वोच्चसम्म पुग्ने विद्यार्थीहरुले बताएका छन् ।
यस विषयमा परीक्षा नियन्त्रक कार्यालयले अहिलेसम्म कुनै प्रतिक्रिया दिएको छैन ।
भिडियोमा हेरौं, विद्यार्थीहरुको प्रतिक्रिया :
