– हिरालाल आचार्य ‘डायमण्ड’
चितवन, मंसिर १४ –
चितवन राष्ट्रिय निकुञ्जमा दुई वटा गैंडाको हत्या गरी खाग लिएर फरार भएका ८ जना पक्राउ परेका छन् । चितवन राष्ट्रिय निकुञ्जको कार्यालय कसरामा आज पत्रकार सम्मेलन गर्दै निकुञ्जले ८ जनालाई पक्राउ गरिएको जनाएको छ ।
पत्रकार सम्मेलनमा बोल्दै राष्ट्रिय निकुञ्ज विभागका महानिर्देशक डा सिन्धुप्रसाद ढुंगानाले मङ्सिर ९ गते पूर्वी चितवनको राप्ती नगरपालिका–३ बाट ६ जना र ११ गते सोही नगरपालिकाको भण्डाराबाट दुई जनालाई पक्राउ गरिएको जानकारी दिए । पक्राउ परेकाहरु चितवन र मकवानपुरका हन् ।
निकुञ्जको पूर्वी क्षेत्रमा पर्ने चपरचुली सुरक्षा चौकीबाट ३ किलोमिटर दक्षिण–पूर्वतर्फ खाल्डोमा पारेर दुई वटा गैँडा मारिएको अवस्थामा कात्तिक ३० गते फेला परेका थिए । अन्दाजी १८ र ६ वर्षका पोथी गैँडा मारेर खाग लगिएको थियो ।
घटनाको अनुसन्धान गर्दै जाँदा १० दिनपछि निकुञ्ज प्रशासन, नेपाली सेना र नेपाल प्रहरीको केन्द्रीय अनुसन्धान ब्यूरोले ८ जनालाई पक्राउ गर्न सफल भएको हो । उनीहरुको साथबाट गैंडाको खाग, भरुवा बन्दुक, मोटरसाइकल लगायतका सामग्री समेत बरामद गरिएको छ ।
राष्ट्रिय निकुञ्ज तथा वन्यजन्तु संरक्षण विभागका उपमहानिर्देशक बेदकुमार ढकालको संयोजकत्वमा गठित टोलीले स्थलगतरुपमा अध्ययन गरेर यही मङ्सिर १२ गते विभागका महानिर्देशक डा. सिन्धुप्रसाद ढुङ्गानालाई प्रतिवेदन समेत बुझाइसकेको छ ।
पुरातन शैलीमा गैँडा मारिएपछि सर्वत्र चासो र चिन्ता व्यक्त गरिएको थियो । पत्रकार सम्मेलनमा महानिर्देशक ढुंगानाले गैंडा मार्नेहरुमध्ये एक जना पहिला पनि गैंडा मारेको प्रकरणमा अनुसन्धानका लागि तानिएका व्यक्ति भएको बताए । यद्यपि त्यतिबेला उनी निर्दाेष ठहरिएका थिए ।
सशस्त्र द्वन्द्वको समयमा एकै वर्षमा ३८ वटासम्म गैँडा तस्करले मारेको तथ्यांक भए पनि पछिल्ला वर्षहरूमा वन्यजन्तु चोरी सिकारी घटेर गएको थियो । कतिपय वर्षमा निकुञ्जले शून्य चोरी सिकार वर्ष समेत मनाएको थियो ।
गत वर्ष दुईवटा गैँडा मारिएका थिए । चितवन राष्ट्रिय निकुञ्जमा पछिल्लो गणनाअनुसार ६ सय ९४ गैंडा रहेका छन् । नेपालमा सात सय ५२ गैँडा रहेका छन् ।
