सिमित संख्यामा स्थानीय बसलाई नारायगगढ आउन नदिएको महानगपालिकाले म्याजिक र अटोेको भने व्यवस्थापन गर्न सकेको छैन । अटो र म्याजिकको संख्या अत्याधिक हुँदा राजमार्ग अस्तव्यस्त छ । बसपार्कमै सवारी रोकिन थालेपछि बजारमा म्याजिक र अटोहरु थपिँदै गएका छन् । अटोको भाडादर कायम नगरिँदा अटोले लुट मच्चाइरहेका छन् ।

महानगरपालिकाका प्रशासकीय अधिकृत नरेन्द्र कुमार रानाले बसापार्कमा बस रोक्ने निर्णयलाई पुनः विचार गर्न सकिने बताए । बजारमा अटोको चर्काे भाडा रहनुका साथै म्याजिक र अटोको सँख्या बढी भएको स्वीकार गर्दै उनले यसको नियमन गर्ने अधिकार आफूहरुसँग नहुँदा समस्या परेको बताए ।

महानगरपालिकाको यो निर्णयअघि सवारी साधनहरु राजमार्गमा पर्ने नारायणगढसम्म आउँथे र त्यहाँबाट फर्केर बसपार्क जान्थे । उनीहरुले यात्रुहरुलाई विभिन्न तोकिएका स्थानमा ओराल्दथे ।

म्याजिक र अटो व्यावसायीलाई मनपरी गर्न छुट दिएको महानगरपालिका उनीहरुकै स्वार्थमा बसहरुलाई प्रवेश गर्न नदिइएको भन्दै मिनिबस व्यावसायीले पनि विरोध जनाइरहेका छन् ।

यसैगरी पूर्वपश्चिम राजमार्ग भएकाले बसहरुलाई चोकचोकमा यात्रु ओराल्ने व्यवस्था मिलाई पुल्चोकसम्म गएर पुनः फर्काउने व्यवस्था मिलाउन पूर्वि चितवनका जनप्रतिनिधि, राजनैतिक दल र विद्यार्थी संगठनहरुले माग गर्दै आएका छन् ।

चितवन २ का जनप्रतिनिधि रवि लामिछाने, चितवन १ का जनप्रतिनिधि हरि ढकाल, नेकपा एमाले चितवन, विभिन्न विद्यार्थी संगठनहरुले महानगरको निर्णयबाट यात्रुले दुखः पाएको भन्दै निर्णय फिर्ता लिन माग गरिरहेका छन् ।

यात्रुहरुले यो निर्णयले आफूहरुलाई सास्ती भएको दुखेसो गरेका छन् । विशेष गरी विद्यार्थीहरु मर्कामा परेका छन् । सवारी नारायणगढ बजारको पुलचोकसम्म आएर फर्कँदा कुनै फरक पर्दैन किनकी त्यो पूर्वपश्चिम राजमार्ग हो ।

यदि बजारको भिड नै व्यवस्थापन गर्न खोजिएको हो भने म्याजिकको बिगबिगी र अटोको लुटतन्त्रलाई अन्त्य गर्दै ठूला सवारी साधन सिटीबसहरु सञ्चालनमा ल्याउनु पर्ने हो । तर महानगरपालिकाले भने उल्टो नीति लिएको छ ।