– हिरालाल आचार्य ‘डायमण्ड’
चितवन, भदौ २५ –
श्री जनशक्ति आधारभुत विद्यालय गैंडाकोट १३ बेल्डिहाका पूर्व प्रअ कालिका प्रसाद देवकोटाले आर्थिक हिनामिना गरी स्वेच्छिक अवकाश लिएको तथ्य बाहिरिएको छ ।
पूर्ब प्रधानाध्यापक कालिका प्रसाद देवकोटाले विद्यालयको ९ लाख ५० हजार रुपैयाँ रकम हिनामिना गरेको पाइएको हो ।
२०६७ सालमा प्रअ बनेका गैंडाकोट १३ निवासी देवकोटाले २०७६ सालमा स्वेच्छिक अवकाश लिएका थिए । तरअवकाश हुने बेलामा विद्यालयको आर्थिक क्रियाकलाप प्रष्टरुपमा पारेर जानुको सट्टा आर्थिक हिनामिना गरी रकम कुम्ल्याएर हिँडेको पाइएको हो । देवकोटाले अनियमितता गरेको कुरा लेखा परीक्षण प्रतिवेदन २०७७/०७८ ले पुष्टि गरिसकेको छ ।
विद्यालयको स्वतन्त्र रुपमा लेखा परीक्षण गर्ने जिम्मा पाएको भरतपुर ३ मा अवस्थित होम बस्नेत एण्ड एसोसियट्सले गरेको स्वतन्त्र लेखा परीक्षणको प्रतिवेदनले पूर्व प्रअ देवकोटाले ९ लाख ५० हजार हिनामिना गरेको पुष्टि भएको हो । विद्यालयमा बन्दै गरेको चार कोठे आरसिसि भवन निर्माण, विद्यालयमा भएको महायज्ञका बेला देवकोटाले ठूलो रकम हिनामिना गरेको प्रतिवेदनमा देखिन्छ ।
उक्त अनियमितताका विषयमा निर्णय गर्दै विद्यालय व्यवस्थापन समितिले पनि पूर्व प्रअ देवकोटाले ९ लाख ५० हजार बराबरको रकम फिर्ता गर्नुपर्ने प्रतिवेदन तयार पारेको छ । पूर्व प्रअ देवकोटालाई उक्त रकम फिर्ता गर्न पटकपटक ताकेता गर्दा पनि देवकोटाले अटेर गरिरहेको विद्यालय व्यवस्थापन समितिका अध्यक्ष खुम प्रसाद पौडेल बताउँछन् । रकम फिर्ता गर्न माग गरी पूर्व प्रअ देवकोटालाई पत्र पठाएको भोलि पल्ट विद्यालयमा अज्ञात समूह पठाएर धाकधम्की समेत दिने, सिसा फुटाउने अध्यक्ष पौडेल बताउँछन् । विभिन्न राजनितिक ब्यक्तिहरुको आड लिएर धम्कीको भाषाहरु प्रयोग गर्ने र त्यो पैसा तिर्न पर्दैन भन्दै हिँड्ने गरेको उनले बताए ।
पूर्व प्रअ देवकोटालाई विद्यालयमा स्वयम उपस्थिति भई हिसाबकिताबका बारेमा बुझाउन विद्यालय व्यवस्थापन समिति र लेखापरीक्षकले पटकपटक बोलाए पनि प्रअ उपस्थिति हुन नमानेको विद्यालय व्यवस्थापन समितिको प्रतिवेदन र लेखा परीक्षकको प्रतिवेदनमा उल्लेख गरिएको छ ।
विद्यालयका हालका प्रधानाध्यापक कपिल बाबु अर्यालले सम्बन्धि कागजातहरु आफूले नगरपालिकामा उपलब्ध गराइसकेको बताए । उनले सबै कागजात र प्रमाणहरु पेस गरेर पूर्व प्रअबाट रकम असुल उपर गरी पाउँ भनि नगर शिक्षा र जिल्ला शिक्षा समन्वयन समितिमा पेस गरिसकेको बताए ।
अनियमितता भएको प्रतिवेदनहरु आएपछि भ्रष्टाचार मुक्त समाजका युवा अभियन्ता स्थानीय गैंडाकोट १३ निवासी संजय भीम बहादुर थापाले अख्तियार दुरुपयोग अनुसन्धान आयोग टंगाल काठमाडौंमा उक्त अनियमितताको विरुद्धमा उजुरी समेत दिएका छन् । पहिलो पटकको उजुरीमा कुनै प्रमाण पेस नगरेको भन्दै अख्तियारले तामेलीमा राखेपछि थापाले प्रमाण समेत समावेश गरी पुनः उजुरी दिएका छन् ।
थापाले नगरपालिकाको शिक्षा शाखा, जिल्ला शिक्षा समन्वयन सबैतिर प्रमाणसहित उजुरी दिइसकेको भए पनि अहिलेसम्म उक्त उजुरी उपर कुनै पनि निकायले निर्णय गरेका छैनन् । यसरी छानबिन गर्नुपर्ने निकायको ढिलासुस्ति अझै जारी रहे आफू अनसन बस्ने तयारीमा रहेको भ्रष्टाचार मुक्त समाजका युवा अभियान्ता थापा बताउँछन् ।
नगरपालिकाको शिक्षा शाखाले अख्तियारबाट आफूहरुलाई पत्र आएको र उक्त पत्रमा माग गरिएका कागजात विद्यालयबाट झिकाएर अख्तियार पठाउने तयारी गरिराखिएको जनाएको छ । पालिका भित्रका विद्यालयको नियमन गर्ने अधिकार पालिका कार्यालयसँग छ । तर ३ वर्ष भइसक्दा पनि नगरपालिकाले यस विषयमा कुनै कदम नचाल्नुले गैंडाकोट नगरपालिको गतिविधि पनि संकास्पद देखिएको स्थानीयहरुले बताउने गरेका छन् ।
विद्यालय व्यवस्थापन समितिका पूर्व अध्यक्ष एवम्, गैंडाकोट १३ का पूर्व वडाध्यक्ष पदमलाल पौडेलले देवकोटाले उक्त रकम फिर्ता गर्नैपर्ने बताए । देवकोटाले गरेको आर्थिक हिनामिनाको विरुद्ध आफूहरु अब कानुनी उपचारको खोजीमा लाग्ने उनको भनाइ छ ।
यस विषयमा पूर्व प्रअ कालिका प्रसाद देवकोटाले ५ लाख ७९ हजार आफूले पाउनु पर्ने र आफूले तिर्नुपर्ने रकम १ लाख ३२ हजारमात्र रहेको प्रतिक्रिया दिए । उनले स्वतन्त्र लेखापरीक्षकको रिर्पाेट राजनैतिक प्रतिशोधका आधारमा गलत निकालिएको आरोप समेत लगाएका छन् ।
