चितवन, २० साउन
उपाचारको क्रममा चार महिने गर्भवती महिलाको मृत्यु भएको घटनामा मनकामना अस्पतालले गल्ति स्वीकारेको छ।
भरतपुर महानगरपालिका–२६ घर भएकी ३२ वर्षीय नविना महतोको उपचारका क्रममा मृत्यु भएको थियो । चार महिने गर्भवतीको मृत्यु भएपछि मृतकका आफन्तहरुले चिकित्सकले लापरवाही गरेको भन्दै अस्पताल घेराउ गर्दै गेटमा ताल्चा समेत लगाइदिएका थिए । आज दिनभर आफ्न्त र अस्पताल प्रशासन बीच भएको बैठकमा अस्पतालले आफ्नो गल्ति स्वीकारेको हो ।
गल्ति स्वीकार गर्दै अस्पतालले पिडित पक्षलाई २७ लाख ५० हजार रुपैंया दिएको छ । सो रकम वार्ताकै क्रममा पिडित पक्षलाई अस्पतालले चेक हस्तान्तरण गरेको वार्तामा सहभागि एक आफन्तले बताएका छन्। स्रोतका अनुसार पिडित पक्षले सुरुमा ४० लाख मागेको थियो तर अस्पतालले १० लाख मात्रै दिने भनेको थियो । यसै बीच कुरा नमिले पछि २७ लाख ५० हजार रुपैंयामा सहमति भएको हो । आज दिनभर भएको अस्पताल प्रशासन र आफन्तहरु विचको वार्तामा अस्पतालले गल्ती स्वीकारेपछि शव उठाएको मृतकका देवर सन्तोष चौधरीले बताए ।
चार महिनाको गर्भपतनको लागि अस्पताल आएकी उनको अपरेसन पछि अत्याधिक रक्तश्राव भएर मृत्यु भएको हो ।
घटनाको बिषयमा अस्पतालले आधिकारीक रुपमा केहि जानकारी गराएको छैन ।
