झापा साउन ६,
महामारीको रूपमा फैलिएको ‘लम्पी स्किन’ रोगबाट कोशी प्रदेशका २ लाख २५ हजार ४२३ गाईभैंसी संक्रमित भएका छन् ।
राँगाभैंसीभन्दा गाईगोरुमा रोगको समस्या बढी छ ।
लम्पी स्किनबाट शुक्रवारसम्ममा ५ हजार ४२ गाईभैंसी मरेका पशुपन्छी तथा मत्स्य विकास निर्देशनालय विराटनगरले जनाएको छ ।
निर्देशनालयका फोकल पर्सन डा. देवकुमार दर्लामीका अनुसार लम्पी स्किनको संक्रमण कोशीका सबै जिल्लामा फैलिएको छ भने इलाम, झापा, मोरङ, पाँचथर, सुनसरी र उदयपुरमा सबैभन्दा बढी क्षति भएको छ ।
प्रदेशभर ४ हजार ९७९ गाईगोरु र ६१ रागाभैंसी मरेका छन् । तीमध्ये सबैभन्दा बढी इलाममा १ हजार ३८२ गाईगोरु र राँगाभैंसी मरेका निर्देशनालयले जनाएको छ । झापामा ५०४, पाँचथरमा ४२२, मोरङमा ४८८, उदयपुरमा ३८५, सुनसरीमा ३६२, खोटाङमा २७९, धनकुटामा २७७, संखुवासभामा २८५, ओखलढुंगामा २०२, तेह्रथुममा १४४, ताप्लेजुङमा १७०, भोजपुरमा ८३ र सोलुखुम्बुमा ३५ गाईगोरु र राँगाभैंसी लम्पी स्किनको संक्रमणबाट मरिसकेका छन् ।
मृत्युदर इलाममा धेरै भए तापनि प्रभावित पशु पाँचथरमा धेरै छन् । आजसम्मको तथ्यांक अनुसार पाँचथरमा ३३ हजार ८७ गाईगोरु र राँगाभैंसी लम्पी स्किनबाट संक्रमित रहेका निर्देशनालयका फोकल पर्सन डा. दर्लामीले जानकारी दिए ।
उनका अनुसार इलाममा ३१ हजार ३४९, धनकुटामा २१ हजार ५६८, उदयपुरमा २१ हजार १८८, सुनसरीमा १७ हजार ८८६, तेह्रथुममा १५ हजार ९८६, मोरङमा १३ हजार ८९०, संखुवासभामा १३ हजार ४६०, खोटाङमा १२ हजार ९१०, ओखलढुंगामा ७ हजार ६९४, ताप्लेजुङमा ७ हजार ६२३, भोजपुरमा ७ हजार १५२ र सोलुखुम्बुमा ७०५ गाईगोरु र राँगाभैंसीमा लम्पी स्किनको संक्रमण पुष्टि भइसकेको छ ।
लम्पी स्किनको संक्रमण गाईगोरुको तुलनामा राँगाभैंसीमा न्यून संख्यामा देखिएको छ । कोशी प्रदेशमा संक्रमित संख्यामध्ये गाईगोरु २ लाख २३ हजार ७२६ छ भने राँगाभैंसीको संख्या १ हजार ८१७ मात्र रहेको छ ।
