– हिरालाल आचार्य ‘डायमण्ड’
चितवन, असार १८ –
चितवनका नीजि विद्यालयले कुल विद्यार्थी संख्याको १० प्रतिशत विद्यार्थीलाई दिनुपर्ने छात्रवृत्तिमा मनपरी गरेको भन्दै अनेरास्ववियु चितवनले छात्रवृत्ति पाउने विद्यार्थीहरुको नाम सार्वजनिक गर्न माग गरेको छ ।
आज एमाले निकट अनेरास्ववियु चितवनका संयोजक हरि आचार्यले विज्ञप्ति जारी गर्दै सो माग गरेका हुन् ।
विज्ञप्तिमा भनिएको छ, ‘वडाध्यक्षहरुले आफू अनुकुलका विद्यार्थीहरुलाई छात्रवृत्ति दिन सिफारिस गरेको, विद्यालय प्रशासनले लगानी कर्ता, शिक्षक, कर्मचारीका छोराछोरीका नाममा छात्रवृत्ति राख्ने गरेको, निवेदन दिएका र छात्रवृत्ति पाउने विद्यार्थीका नाममा दुई महिनाको छात्रवृत्ति राखि पालिकामा पठाइएको भनि अभिभावकहरुबाट गुनासो आएको हुँदा यस विषयमा छानबिन गर्न सम्बन्धित पालिकालाई अनुरोध गर्दै, विद्यालयमा अनुगमन गर्न र १० प्रतिशत छात्रवृत्ति कडाइका साथ कार्यान्वयनमा ल्याउने उद्देश्यका साथ दबाब सृजना गर्न अनेरास्ववियु पालिका कमिटीलाई निर्देशन गर्दछौं ।’
माध्यमिक तहसम्मको शिक्षामा नीजि तथा संस्थागत विद्यालयहरुले कुल विद्यार्थीहरुको १० प्रतिशत संख्या नघट्ने गरी छात्रवृत्ति उपलब्ध गराउनु पर्ने नियम छ । तर
चितवनका नीजि विद्यालयले त्यो छात्रवृत्ति उपलब्ध गराउन आनाकानी गरेपछि अनेरास्ववियु चितवनले पटकपटक आन्दोलन गरी नीजि विद्यालयलाई पनि छात्रवृत्ति दिने अवस्थामा पुराएर सम्झौता गरी आन्दोलनका थप कार्यक्रम फिर्ता लिएको थियो ।
छात्रवृत्ति दिँदा जेहेन्दार, विपन्न, असहाय तथा गरिब, अपाङ्ग, महिला, दलित, जनजाती, द्वन्द्व पीडित र शहीद परिवारका विद्यार्थीहरुलाई उपलब्ध गराउनु पर्ने नियम छ । उक्त नियमभन्दा बाहिर गएर चितवनका अधिकांश नीजि विद्यालयले आप्mना मान्छेलाई छात्रवृत्ति प्रदान गरेको अभिभावकहरुको गुनासो छ । उक्त गुनासा ेआएपछि अनेरास्ववियुले सबै पालिका, प्याब्सन चितवन र अभिभावक संघलाई विज्ञप्ति दिँदै यसतर्फ ध्यानाकर्षण गराएको हो ।
छात्रवृत्ति आवश्यक नपर्ने विद्यार्थीले पाएको भन्दै छात्रवृत्तिको सम्पूर्ण जानकारी सूचना पार्टीमा टाँस गरी अभिभावक र विद्यार्थीहरुलाई सूचित गराउन विद्यालय संचालकहरुलाई अनेरास्ववियुले माग गरेको छ । यदि त्यसो नगरे अनेरास्ववियु फेरि पनि आन्दोलनमा उत्रन बाध्य हुने र त्यसबाट सृजना हुने परस्थितिको जिम्मेवारी स्वयम विद्यालयले लिनुपर्ने अनेरास्ववियुको चेतावनी छ ।
