चितवन, असार १२ –
– हिरालाल आचार्य ‘डायमण्ड’
चितवनको भरतपुर महानगरपालिका १ स्थित नारायणगढ बजार स्थिति नारायणी नदी किनारलाई सी बीच मोडलमा विकास गरिएपछि पर्यटकीय चहलपहल बढेको छ ।
यसले चितवनलाई अब पर्यापर्यटन मात्रै होइन, जल पर्यटनका लागि पनि उपयुक्त थलो बनाएको छ ।
समुन्द्रिक किनारको सी बीच जस्तै झल्को दिने गरी पर्यटकीय गन्तव्यका रुपमा विकास गर्न महानगरले गुरुयोजना बनाएर केन्द्रको समन्वयमा बजेट ल्याएर विकासका पूर्वाधार निर्माण गरेको हो ।
सो ठाउँमा ऊर्जा, जलस्रोत तथा सिँचाइ मन्त्रालयको नारायणी नदी व्यवस्थापन आयोजनाले नदी तटबन्धनसँगै सौन्दर्यकरणको काम सम्पन्न गरेको छ । सो मन्त्रालयको पर्यटन विभागले पद मार्ग, पार्किङस्थल लगायतका काम गरेको छ । सहरी विकास मन्त्रालयअन्तर्गत सघन सहरी तथा भवन निर्र्माण आयोजनाले आरतीस्थल निर्माण र विद्युतीकरणको काम गर्दैछ । महानगरपालिकाले आफ्नै बजेटमा त्यहाँ हरियाली र थप आकर्षक बनाउन काम गरिरहेको महानगरपालिकाका प्रमुख प्रशासकीय अधिकृत नरेन्द्र कुमार रानाले बताए ।
नारायणी नदी व्यवस्थापन आयोजनाका निर्देशक गणेश मरासिनीका अनुसार कार्यालयले नारायणगढको नारायणी पुलदेखि उत्तरतर्फ नौ सय ८५ मिटर क्षेत्रमा नदीको बगरक्षेत्र सकिएपछि पानी नजिक पक्की तटबन्ध निर्माण गरेको छ । नदीको सतहदेखि दुई दशमलव पाँच मिटर उचाइमा ११ खुट्किला निर्माण गरिएको हो । रु १५ करोड ९२ लाखमा सम्झौता भई काम सम्पन्न भएको हो ।
फराकिला रहेका खुड्किलामा मानिस बिहान बेलुका हिँडडुल गर्ने र बस्ने गरेका छन् । खुड्किलाको पाँचपाँच मिटरको फरकमा वृक्षरोपण समेत गरिएको छ । यसले झन् सौन्दर्य बढाएको छ ।
महानगरपालिकाले गतवर्ष नै नदीको सिमाना सुरु हुने स्थान नजिक दुई दशमलव चार किलोमिटर पदयात्रा निर्माण गरेको थियो । अहिले त्यसलाई थप सुन्दर बनाउन एक सय हाराहारी चारपाङ्ग्रे सवारी अट्ने तीन पार्किङस्थल, बगैँचालगायत निर्माणका काम भइरहेका छन् । महानगरपालिकाको ६ करोड ५० लाख बजेटमा सो काम सम्पन्न हुने चरणमा रहेको महानगरपालिकाले जनाएको छ ।
यसैगरी पानी छेउकै खुड्किला र नदी सिमानाको पैदलमार्गको बीचमा रहेको बगरको भागमा धार्मिक क्षेत्र, प्रदर्शनी क्षेत्र र खेल क्षेत्रका लागि छुट्टाछुट्टै स्थान तय गरिएको छ । त्यहाँ बगैँचा, फुटबल मैदान, भलिबल, ब्याडमिन्टन कोर्ट, बीच भलिबल, अन्य खेलका लागि छुट्टै भूभाग, बालुवा तथा बालबालिकाको खेल, अवलोकन क्षेत्र, विश्रामस्थल, शौचालय, पार्किङलगायत संरचना निर्माण गर्ने महानगरको गुरुयोजनामा उल्लेख छ । नारायणीको पुलबाट नारायणी लिफ्ट सिँचाइसम्मको दुई दशमलव पाँच किलोमिटर लामो सो भूभाग १५ बिघा क्षेत्रमा फैलिएको छ ।
त्यसैगरी नारायणी नदीको सोही क्षेत्रमा आरती प्लेटफर्म निर्माण गरिँदै छ । सघन सहरी तथा भवन निर्माण आयोजनाले दुई करोडको लागतमा कामको तयारी गरेको छ ।
नारायणी घुम्न आएकाहरुले नदी किनार विदेशको झल्को दिने गरी बनाइएकोमा प्रशंसा गरेका छन् । यद्यपी खानेपानीको व्यवस्था र सार्वजनिक शौचालयको संख्यामा पनि वृद्धि गनुपर्ने आवश्यकता नारायणी घुम्न आएकाहरुले औंल्याएका छन् ।
नारायणी आएका सुलोचना उपाध्याय, बालकृष्ण पौडेल, अमृत कुमार मास्के, राममाया श्रेष्ठ र सुलोचना उपाध्यायलाई हामीले प्रतिक्रिया लिँदा पहिले भन्दा राम्रो लागेको बताए ।
पर्यटकीय चहलपहल बढेसँगै नारायणी नदीमा सञ्चालित ८ कम्पनीका ३० मोटर बोट, किनारमा रहेका २०० भन्दा बढी ठेला व्यावसायी र फोटो खिच्न खटिएका १०० भन्दा बढी क्यामेरा म्यानको व्यावसाय पनि फस्टाएको छ ।