– हिरालाल आचार्य ‘डायमण्ड’
चितवन, जेठ १ –
चितवनको चौकिडाडामा सुरु भएको प्याराग्लाइडिङ्गमा पर्यटकहरुको चहलपहल बढाउन होटल व्यावसायीहरुले सहयोग गर्ने भएका छन् ।
हिमालय फ्रन्टियर्स प्याराग्लाईडिङ प्रालिले आज दासढुङ्गामा राखेका चितवनको पर्यटन विकासमा प्याराग्लाइडिङ्ग नामक अन्र्तक्रिया कार्यक्रममा होटल व्यावसायीहरुले सक्दो सहयोग गर्ने प्रतिवद्धता व्यक्त गरेका हुन् ।
बैशाख १ गतेबाट भरतपुर–२९ चौकीडाँडाबाट सुरु भएको प्याराग्लाईडिङले चितवनको पर्यटनमा नयाँ आयाम थपेको छ । प्याराग्लाइडिङको वैशाख १८ गते प्रधानमन्त्री पुष्पकमल दाहालले औपचारिक रुपमा उद्घाटन गरेका थिए ।
पोखराको शरङकोटमा १० वर्षदेखि प्याराग्लाइडिङ्ग गरिरहेको उक्त कम्पनीले व्यावसाय विस्तार गर्दै चितवनमा पनि ल्याएको हो ।
३० मिनेटको प्याराग्लाइडिङका लागि अहिले ६ हजार रुपैयाँ लाग्ने हिमालय फ्रन्टियर्स प्याराग्लाईडिङ प्रालिले जनाएको छ । चौकीडाडालाई विशेष पर्यटकीय गन्तव्यको रुपमा विकास गर्न बम्जी जम्प, होटल, हिल स्टेशन बनाउने गरी कम्पनीले अध्ययन सुरु गरिसकेको जनाएको छ ।
प्याराग्लाइडिङ्गले चितवनमा पर्यटकका लागि अर्को आकर्षण थपिएको र जसले पर्यटकको बसाइ लम्बाउने भन्दै आजको कार्यक्रममा होटल व्यावसायीले खुसी व्यक्त गरेका छन् ।