काठमाडौं बैशाख ३०
राष्ट्रिय स्वतन्त्र पार्टी (रास्वपा)का सभापति रवि लामिछानेले एउटा काण्डको छानबिन गर्दैमा सरकारको नै सफलता भन्न नसकिने बताएका छन् । शनिबार काठमाडौंको नक्सालमा नागरिक अगुवाले भ्रष्टाचार र भ्रष्टाचार ढाकछोपविरुद्ध गरेको बृहत् आन्दोलनका क्रममा सञ्चारकर्मीसँग उनले यस्तो बताएका हुन् ।
एउटा काण्डको अनुसन्धान गर्दैमा सरकारलाई सफल भन्दा अलि धेरै हुने टिप्पणी उनले गरे । अरू धेरै काण्डहरूको अनुसन्धान गरिए सरकारको सफलता मान्न सकिने उनको भनाइ छ ।
नक्कली भुटानी शरणार्थीकाण्डलाई सुरुआत विन्दु मानिएको भए सरकारलाई धन्यवाद दिनुपर्ने उनले बताए ।
कुनै पनि पार्टी र पार्टीका शीर्ष नेताहरू कसैले पनि विषयान्तर गर्न नहुनेमा उनले जोड दिए । आफ्नो दलका लागि दोषीलाई बचाउने, छेक्ने, ढाट्ने कार्य नगर्न उनले आग्रह गरे ।
“नेपालले भ्रष्टाचार गर्ने पूर्वगृहमन्त्रीहरूलाई समेत कारबाहीको दायरामा ल्यायो भन्ने नजिर अन्तर्राष्ट्रिय देशलाई देखाउनुपर्छ । देशको बेइज्जत होइन, भ्रष्टाचार गर्नेहरूको उजागर भयो । विभिन्न देशका पूर्वप्रधानमन्त्रीहरू हतकडी लाएर झेल गएको देखेका छौैँ । यो देशको बेज्जत भएको होइन, यो देशको इज्जत बढ्यो,” उनले भने, “पूर्वप्रधानमन्त्रीहरूलाई हतकडी लगाएर जेलमा कोच्ने देशहरूको नजिर नेपालले लिने हो । गलत छन् भने हेर्ने होइन, प्रमाणित गर्ने कोसिस होला । जो–जो मुछिए पनि समाएर अनुसन्धानको दायरामा ल्याउने, कसैलाई पनि छोड्ने होइन । एउटा काण्डको अनुसन्धान खोल्दैमा सरकारलाई नै सफलता भन्दा अलि धेरै हुन्छ । त्यति धेरै पनि नलियौँ होला । आशावादी हुनुपर्छ । धेरै काण्डहरू लाइनमा छन्, ती काण्डहरू पनि अनुसन्धान हून् । अनि हेर्छौँ । सरकारले यसलाई सुरुआत विन्दु मानेको हो भने स्याबास् सरकार, तर यो रोकिनु भएन । अहिलेलाई विषयान्तर कसैले नगरोस् । आफ्नो दलको लागि दोषीलाई बचाउने, छेक्ने, ढाँट्ने नगर्नुस् । नांगिसक्यो, अब किन छेक्ने ?”
