– हिरालाल आचार्य ‘डायमण्ड’
चितवन, चैत ३०
देशको तेश्रो पर्यटकीय गन्तव्य चितवन सौराहा नयाँ वर्षका बेला पर्यटकले भरिएको छ । नयाँ वर्ष मनाउन आन्तरिक पर्यटक सौराह पुगेका हुन् ।
देशका विभिन्न भागबाट सौराह पुगेका पर्यटकका कारण अहिले सौराहा भरिभराउ छ । सौराहका ९० प्रतिशतभन्दा बढी होटल भरिएको क्षेत्रीय होटल व्यावसायी संघ सौराहाका अध्यक्ष गंगा गिरीले जानकारी दिए । कोभिडपछि आन्तरिक पर्यटकहरु बढ्दै गएको गिरीले बताए ।
उनले नयाँ वर्षमा सौराहमा ३५ सय जति आन्तरिक र ५०० जति बाह्य पर्यटक रहेको बताए । उनले सौराहमा दैनिक ४ हजार ५ सय पर्यटक आएमा मात्र सौराहको पर्यटन व्यावसाय फस्टाउने बताए । नयाँ वर्षपछि सौराहलाई चलायमान राख्न घुमौ चितवन अभियान लिएर देश दौडाहमा जाने योजना बनाएको उनले जानकारी दिए ।
होटल व्यावसायी एवम् क्षेत्रीय होटल व्यावसायी संघ सौराहका पूर्व अध्यक्ष दिपक भट्टराईले कोभिडपछि पहिलोपटक नयाँ वर्षमा सौराहका होटल पर्यटकले भरिएको बताए । उनले ७० प्रतिशत जति आन्तरिक र बाँकी बाह्य पर्यटक रहेको बताए । बाह्यमा विशेष गरी चाइनिजी र भारतीय पर्यटक बढी छन् । अब सौराहको पर्यटन व्यावसाय चलायमान हुँदै जाने संकेतहरु देखिएको भट्टराई बताउँछन् । उनले चिनिया पर्यटकहरुको बुकिङ्ग आइरहेको बताए ।
नयाँ वर्षमा ठूलो कार्यक्रम नराखिएपनि साँझ पख सडकमा विभिन्न जातीका झाँकी प्रदर्शन गर्ने गरिएको छ । यसका अलवा होटलभित्रै पनि होटलहरुले साँस्कृतिक कार्यक्रम राखेका छन् ।
नयाँ वर्ष मनाउन देशका विभिन्न स्थानबाट सौराहा आएका आन्तरिक पर्यटकले सौराह आउँदा रमाइलो लागेको बताएका छन् ।
पर्यटकीय गन्तव्यका हिसाबले देशको तेश्रो भए पनि सौराहा वाइल्डलाइफ पर्यटनको पहिलो गन्तव्य हो । सौराहाको विकल्पका रुपमा उदाइरहेको पश्चिम चितवनको मेघौली पनि पर्यटकले भरिभराउ भएको छ ।
मुख्य गरी सौराहा तथा मेघौली आउने पर्यटक हात्ती, डुङ्गा, जिप सफारी गरेर चितवन राष्ट्रिय निकुञ्जमा रहेका गैँडा, बाघलगायत जङ्गली जनावर हेर्न रुचाउँछन् ।