– हिरालाल आचार्य ‘डायमण्ड’
चितवन, चैत ११
राष्ट्रिय स्वतन्त्र पार्टीका सभापति रवि लामिछानेको पूरानो नागरिकतालाई सर्वाेच्च अदालतले मान्यता नदिएपछि चितवन निर्वाचन क्षेत्र नम्बर २ संघीय सांसद बिहिन छ ।
उक्त क्षेत्रमा आगामी बैशाख १० गते उपनिर्वाचन गर्ने घोषणा भइसकेको छ । उपनिर्वाचन गराउन निर्वाचन आयोगले धमाधम तयारी तीव्र पारिरहेको छ । चैत २० गते उम्मेद्वारी दर्ता गर्ने मिति तोकिएको छ ।
यस्तो अवस्थामा चितवन २ निर्वाचन मय बन्दै गएको छ । चुनाव लड्नका लागि १८ वटा राजनैतिक पार्टीले दल दर्ता गराएका छन् ।
राष्ट्रिय स्वतन्त्र पार्टीले फेरि पनि सभापति रवि लामिछानेलाई नै उठाउने बताउँदै आएको छ । उक्त पार्टीबाट लामिछानेबाहेक अन्य व्यक्ति उम्मेद्वारको आकांक्षी देखिएका छैनन् । नागरिकता पुनः प्राप्त गरेपछि लामिछाने फेरि उपनिर्वाचनको तयारीमा जुटेका छन् । केही दिनअघि चितवन आएका लामिछानेले चितवन–२ का मतदाताले आफूलाई फेरि जिताउनेमा ढुक्क रहेको बताएका थिए ।
उम्मेद्वारी दर्ता गर्ने मिति नजिकँदै जाँदा अन्य पार्टीहरुबाट भने को उम्मेद्वार बन्छ भन्ने टुंगो छैन ।
गत निर्वाचनमा दोश्रो बनेका नेपाली कांग्रेसका उमेश श्रेष्ठ पनि उम्मेद्वारको आकांक्षी छन् । उनी लामिछानेको पद रिक्त भएपछि आफूलाई स्वतः निर्वाचित गराउन माग गर्दै निर्वाचन आयोग पुगेका थिए । तर संविधानमै यस्तो व्यवस्था नभएको भन्दै आयोगले उनलाई फिर्ता पठाएको थियो ।
कांग्रेसभित्र श्रेष्ठमात्र होइनन् उनी सहित ११ जना उम्मेद्वारका आकांक्षी छन् । नेपाली कांग्रेस चितवन उपसभापति राजिव न्यौपानेले क्षेत्रीय समितिबाट उमेद्वारका लागि ११ जनाको नाम जिल्ला समितिमा आएको र त्यसलाई केन्द्रीय समितिमा सिफारिस गरिएको जानकारी दिए ।
कांग्रेसबाट पूर्व उम्मेद्वार उमेश श्रेष्ठ, जिल्ला सभापति राजेश्वर खनाल, निवर्तमान जिल्ला सभापति जीतनारायण श्रेष्ठ, देवेन्द्र गुरुङ, पूर्व बागमती प्रदेश मन्त्री मिलनबाबु श्रेष्ठ, राजन कार्की, कैलाश कोइराला, विपीन रामुदामु, देवकी गौतम, भरतपुरकी पूर्व उपमयेर पार्वती शाह ठकुरी र गौरी श्रेष्ठ आकांक्षी छन् ।
नेकपा एमालेले पनि उम्मेद्वारको टुंगो लगाइ सकेको छैन । नेकपा एमाले जिल्ला कमिटी चितवनका अध्यक्ष रामप्रसाद न्योपानेले एमालेले आकांक्षीको नाम संकलन गर्ने काम सुरु गरि नसकेको बताए । उनले आफूहरु पार्टीको ग्रासरुट अभियानमै व्यस्त रहेको र अभियान लगत्तै सर्वसहमतिमा उम्मेद्वार टुंगाइने बताए ।
एमालेमा पूर्व उम्मेद्वार कृष्ण भक्त पोखरेल, ०७४ को निर्वाचनमा भरतपुर महानगरका मेयरका उम्मेद्वार देवी ज्ञवाली, बागमती प्रदेशका पूर्वमन्त्री विजय सुवेदी, पोल्ट्रि विज्ञ एवम् व्यावसायी डा. तिलचन्द्र भट्टराई, कालिका नगरपालिकाका पूर्व मेयर गोपि श्रेष्ठ र आफू स्वयमको नाम पनि चर्चामा रहेको पार्टी अध्यक्ष न्यौपानेले बताए ।
यीनै मध्येबाट एक उम्मेद्वार बन्न सक्ने उनले संकेत गरेका छन् । अघिल्लो पटकका उम्मेद्वार तथा दुई पटकसम्म चुनाव जितेका कृष्णभक्त पोखरेलले भने यसपाली आकांक्षा देखाएका छैनन् ।
नेकपा माओवादी केन्द्रमा हालसम्म कसैको दाबी र चर्चा छैन । गत चुनावमा गठबन्धन गरेर माओवादीले कांग्रेसलाई समर्थन गरेको थियो । यसपाली पनि उही गठबन्धन दोहोरिने संकेत देखिएकाले माओवादीका जिल्ला नेताहरु केन्द्रको निर्णय कुरेर बसिरहेका छन् ।
यसैगरी राप्रपाले पनि चितवन–२ को उपनिर्वाचनका लागि उमेद्वारको टुंगो लगाइ सकेको छैन । राप्रपा भरतपुर महानगर कमिटीका सचिव सुलभ सिग्देलले उम्मेद्वारको टुंगो लगाउने गरी बैठक बस्ने तयारी भइरहेको जानकारी दिए ।
राष्ट्रिय जनमोर्चाले चितवन–२ को उपनिर्वाचनमा उपाध्यक्ष जनकराज शर्मालाई उमेद्वार बनाउने निर्णय गरेको छ ।
मंसिर ४ को निर्वाचनमा चितवन–२ मा रवि लामिछाने ४९ हजार दुई सय ६४ मत ल्याएर विजयी भएका थिए । उनका निकटतम प्रतिद्वन्द्वी कांग्रेसका उमेश श्रेष्ठले १४ हजार नौ सय ८३ मत र एमालेका कृष्णभक्त पोखरेलले १४ हजार ६ सय ४७ मत प्राप्त गरेका थिए ।
निर्वाचन कार्यालयका प्रमुख भिमसेन कार्कीले मंसिरको तुलनामा अहिले ४६८ मतादाता थपिन सक्ने आंकलन गरिएको बताए ।
