– हिरालाल आचार्य ‘डायमण्ड’
चितवन, चैत ५ –
स्ववियु निर्वाचनको दिन आज चितवनका २ वटा क्याम्पसमा मात्र चुनाव भएको छ । माडीको माडी बहुमुखी क्याम्पस र टाँडीको शहिद स्मृति क्याम्पसमा मात्र चुनाव भएको हो ।
त्रिविको तीन वटा आंगिक क्याम्पस र १७ वटा सामुदायिक क्याम्पस गरी २० वटामा चुनाव हुनुपर्ने हो । तर त्रिविको ३ वटै आंगिक क्याम्पसमा चुनाव हुन सकेन ।
माडी क्याम्पसमा आठ वटा विद्यार्थी संगठनहरुको गठबन्धनविरुद्ध एमाले निकट अनेरास्ववियु एक्लै चुनावमा होमिएको छ । तर सहिद स्मृतिमा भने एमाले निकट अनेरास्ववियु, माओवादी निकट अखिल क्रान्तिकारी र समाजवादी निकट अनेरास्ववियूबीच तालमेल भएको छ ।
निर्वाचन गराउन सहज वातावरण नभएको भन्दै निर्वाचन अधिकृतहरुले निर्वाचन स्थगित गरेका हुन् । ३ गते त्रिविको आंगिक क्याम्पस वीरेन्द्र बहुमुखी क्याम्पसले चुनाव स्थगित गरेपछि अन्य क्याम्पसहरुले पनि चुनाव स्थगन गर्न सुरु गरे ।
फागुन ३० गते साना मानिएका राजनैतिक दलका विद्यार्थी संगठनले लगाएको ताला चितवन प्रहरीले फुटालेर चुनाव जसरी पनि गराउने भनेर खटिएको थियो । नेपाल समाजवादी विद्यार्थी यूनियन, लोकतान्त्रिक विद्यार्थी संघ लगायतका संगठनले विभिन्न माग राख्दै चितवनका १० वटा क्याम्पसमा लगाएको ताला फुटालिएको थियो । स्ववियु चुनाव जसरी पनि गराउन सहयोग गर्ने फेरि कसैले तालाबन्दी गरे तत्काल फुटाउने र ताला लगाउनेलाई कारबाही पक्राउ गर्नेसम्मको चेतावनी प्रशासनले दिएको थियो ।
तर चैत २ गते माओवादी निकट अखिल क्रान्तिकारीले वीरेन्द्रसहितका विभिन्न क्याम्पसमा तालाबन्दी ग¥यो । उक्त ताला फुटाउने आँट प्रशासनले गर्न सकेन । साना विद्यार्थी संगठनलाई हेपेर ताला फुटाएको चितवन प्रशासन यसरी अखिल क्रान्तिकारीको पक्षमा उभियो ।
अनेरास्ववियु जिल्ला कमिटीका सह–संयोजक हरि आचार्यले आफ्नो संगठनले कतैपनि तालाबन्दी नगरेको र चुनाव चाहेको बताए । उनले अखिल क्रान्तिकारीले आफूले नजित्ने भएपछि तालाबन्दीमा उत्रिएको आरोप लगाए । प्रचण्डको गृह जिल्ला र रेनु दाहाल प्रमुख रहेको महानगरमा अखिल क्रान्तिकारी पत्तासाफल हुने भएपछि चुनाव रोकिएको उनको भनाइ छ ।
कांग्रेस निकट नेविसंघ चितवनका अध्यक्ष राजेश भुषालले केही दिन तलमाथि भए पनि चुनाव हुनुपर्ने बताए । नेविसंघ चुनाव चाहेको र जिल्लामा कतैपनि तालाबन्दी नगरेको उनको भनाइ छ ।
अखिल क्रान्तिकारीका जिल्ला संयोजक विकास कोइरालाद्वारा हस्ताक्षरित विज्ञप्ति चितवनका विभिन्न क्याम्पसको निर्वाचन कार्यालय अगाडि टाँसेर तालाबन्दी गरिएको छ । केही क्याम्पसहरुमा देखिएको विवाद समाधान गरी जिल्लाभर एकसाथ चुनाव गराउनु पर्ने क्रान्किारीको माग छ । कोइरालासँग आज सम्पर्क गर्दा उनीसँग सम्पर्क हुन सकेन ।
चुनाव गराउन माग गर्दै अनेरास्ववियुको प्रदर्शन :
चुनाव रोकिएपछि आज क्याम्पसहरुमा एमाले निकट अनेरास्ववियुले प्रदर्शन गरेका छन् । क्याम्पस प्रशासनले चुनाव गराउन नचाहेको, सत्ता र शक्तिको इशारामा चलि कसैको ताला फुटाल्ने त कसैको तालालाई संरक्षण गरेर प्रशासनले चुनाव रोकेको अनेरास्ववियुको भनाइ छ ।
एकहप्ता भित्र स्ववियु निर्वाचन गराउन अनेरास्ववियु क्याम्पस कमिटीले आआफ्ना क्याम्पसमा माग राखेका छन् । चुनाव नगराए आन्दोलनको आँधिभेरी ल्याउने भन्दै विद्यार्थीहरुले चेतावनी समेत दिएका छन् ।
यसअघि प्रकाशित समाचार :
कमजोर विद्यार्थी संगठनलाई हेपेर ताला फुटाल्ने चितवन प्रशासन अखिल क्रान्तिकारीको पक्षमा उभियो
