– हिरालाल आचार्य ‘डायमण्ड’
चितवन, माघ २१ –
हुलाकी राजमार्ग अन्तर्गत चितवनको माडीमा निर्माणाधीन पुल र सडक लामो समयदेखि अलपत्र परेको छ । सम्झौता मिति सकिएर पटकपटक म्याद थप भइसक्दा पनि अझै काम सम्पन्न हुन सकेको छैन ।
हुलाकी सडक अन्तर्गत माडीमा ७ वटा पुल र ७.७ किलोमिटर सडक निर्माणाधीन अवस्थामा छन् । माडी खण्डमा पर्ने ११ वटा पुल मध्ये ४ वटा पुलको निर्माण सम्पन्न भएर सवारी गुडिरहेका छन् । ३ वटा यसैवर्ष र एउटा पुलको काम गत वर्ष सकिएको थियो ।
हुलाकी राजमार्ग निर्देशनालय योजना कार्यालय विरगञ्जका सूचना अधिकारी दुर्गा मण्डलका अनुसार बाँकी रहेका ७ वटा पुलको सम्झौता २०७३/०७४ सालमै गरिएको थियो ।
हरेक पुलमा २ देखि ३ पटकसम्म म्याद थप भइसकेको छ । ६ वटा पुल निर्माणको म्याद आगामि असार मसान्तसम्म छ । बगै खोलाको म्याद भने सकि सकेको छ । माडीमा रहेका पुल १६ मिटरदेखि २५५ मिटर सम्मका छन् । कुनै पुलको भौतिक प्रगति ३० प्रतिशत मात्र छ भने कुनै पुलको ८० प्रतिशतसम्म छ ।
भौतिक प्रगतिलाई हेर्दा आगामि असारसम्म पनि काम सम्पन्न हुने छाँटकाँट देखिँदैन । किनभने क्रसर उद्योग बन्द भएको भन्दै निर्माण कम्पनीले अहिले पुल निर्माणको काम अगाडि बढाएका छैनन् । ७ वटा पुलमा ५ निर्माण कम्पनीले काम गरिरहेको योजना कार्यालय विरगञ्जले जनाएको छ ।
कार्यालय अन्तर्गतकै माडीको देबेन्द्रपुरदेखि बगै बसपार्कसम्मको सडकको अवस्था पनि विजोग छ । २०७६ सालमा सडक पिचको सम्झौता भएको थियो भने हालसम्म एक पटक म्याद थप भइसकेको छ । सडकको भौतिक प्रगति २२ प्रतिशत मात्र छ ।
सूचना अधिकारी मण्डलले पछिल्लो समय निर्माण कम्पनीकै लापरबाहीले निर्माणमा ढिलासुस्ती भइरहेको बताए । ढिलासुस्ती गर्ने निर्माण कम्पनीलाई कार्यालयले कुनै कारबाही भने गर्न सकेको छैन ।
माडी नगरपालिका प्रमुख ताराकाजी महत्तोले पनि निर्माण कम्पनीले लापरबाही गर्दा काम समयमा सम्पन्न हुन नसकेको बताइन् । पटकपटक सरोकारवाला निकायको बैठक राखेर निर्माण कम्पनीलाई निर्देशन दिँदा पनि काम हुन नसकेको उनी बताउँछिन् ।
हिउँदमा सुख्खा हुने माडीका खोला वर्षातमा उर्लिएर आउँदा सवारी आवतजावत नै ठप्प हुने गरेको स्थानीय रेनुका पौडेलले बताइन् । एम्बुलेन्स पनि आवतजावत गर्न नसक्दा सुत्केरी र बिरामी सबैभन्दा बढी मर्कामा पर्ने गरेका यहाँका स्थानीयको गुनासो छ । विद्याललयका प्रधानाध्यापक हरि पहारीले बाढीका कारण विद्यार्थीहरु विद्यालय आउन नसक्ने गरेको सुनाए । कैयौं स्थानीयले खोला तर्ने बेला ज्यान पनि गुमाइ सकेका घटनाहरु पछि छन् ।
लामो समयसम्म पुल अलपत्र परेपछि स्थानीय युवाहरुले ठेकेदार हराएको सूचना भनेर चोकचोकमा टाँसेका थिए । त्यसपछि ठेकेदार सम्पर्कमा आए पनि कामले गति लिन नसकेको स्थानीय युवा रामचन्द्र लम्साल बताउँछन् ।