चितवन, माघ १६ –
भरतपुरको लङ्कुमा महायज्ञ महोत्सव हुने भएको छ । श्री वैकुण्ठनाथ परमवैदिक विद्याप्रतिष्ठानम् (गुरुकुलम्) को संचालन र विकासका लागि बृहद् अक्षयकोष स्थापनार्थ महायज्ञ गर्न लागिएको हो ।
आयोजकले आज पत्रकार सम्मेलन गर्दे महायज्ञको तयारी तीव्र गतिमा भइरहेको जनाएको छ । मिडिया विभाग प्रमुख माधव सापकोटाले माघ २१ देखि फागुन ६ गतेसम्म महायज्ञ महोत्सव गरिने बताए ।
महायज्ञको प्रथम चरण माघ २२ देखि २८ सम्म यशोदादेवी कौण्डिन्य माता तथा द्वित्तीय चरण माघ २९ देखि फागुन ६ सम्म अन्तर्राष्ट्रिय ख्यातिप्राप्त कथावाचक ईश्वरकृष्ण महाराजले राम कृष्णकथामृत प्रवचन गर्ने आयोजकले जनाएको छ ।
माघ २० गते दिउँसो २ बजे मोटरसाइकल र्याली, महायज्ञको पहिलो दिन माघ २१ गते बिहान १० बजे लीला झाँकीसहित विशाल शोभायात्रा एवम् उद्घाटन हुने छ ।
२०४४ सालमा स्थापना भएको हाल कक्षा ६ देखि १२ सम्म पढाइ हुने सो गुरुकुलमा देशका विभिन्न स्थानबाट आएका ५५ जना विद्यार्थीहरूले निःशुल्क आवास भोजनसहित अध्ययन गरिरहेका महायज्ञ मुल समारोह समितिका संयोजक तुलसिराम सापकोटाले जानकारी दिए ।
माघ २२ देखि फागुन ६ गतेसम्म बिहान ६ बजेदेखि १० बजेसम्म चार वेद, अठार पुराण, रामायण, महाभारत आदि धर्मग्रन्थ पारायण, हयग्रीव- महालक्ष्मी-महासरस्वतीको विशेष आराधना-अर्चना, हवन, बिहान ११ बजेदेखि २ बजेसम्म प्रमुख वाचकबाट सङ्गीतमय श्रीरामकृष्णचरितामृत कथा-प्रवचन, दाता सम्मान, दिउसो २ बजेदेखि ४:३० बजेसम्म विशिष्ट आचार्य , विद्वान् विचारकहरूबाट प्रवचन, बेलुका ४ :३० बजेदेखि ५:३० बजेसम्म आरती, तीर्थ-प्रसाद वितरण, साँझ ७ बजेदेखि १० बजेसम्म राष्ट्रिय कलाकारहरूबाट साङ्गीतिकभजन, लीला- झाँकी तथा नाटक प्रदर्शन हुने आयोजकले जनाएको छ ।
महायज्ञमा दान गर्ने दाताहरुलाई दान रकम अनुसार सम्मान गरिने आयोजकले जनाएको छ ।
पत्रकार सम्मेलनमा दिइएको प्रेस विज्ञप्ति :
थप जानकारीका लागि यसअघि प्रकाशित यी समाचार पढ्नुहोस्,
वैकुण्ठनाथ गुरुकुल संचालनका लागि अक्षयकोष स्थापनार्थ चितवनको लंकुमा महायज्ञ हुने